تلنگانہ میں راہل گاندھی اورپرینکاگاندھی کی بس یاترا

حیدرآباد: تلنگانہ میں کانگریس کے لیڈران راہل گاندھی اورپرینکا گاندھی کی بس یاترا ہونے والی ہے۔جنوبی ہند کی اس نئی ریاست میں 30نومبر کو انتخابات ہونے والے ہیں۔

کانگریس نے پہلے ہی 55امیدواروں کی پہلی فہرست جاری کردی ہے اور بقیہ نشستوں پر امیدواروں کے ناموں کو حتمی شکل دینے کیلئے سرگرم ہوگئی ہے۔

پارٹی ریاست میں اقتدار میں آنے کے لیے حکمت عملی تیار کررہی ہے، رائے دہندوں کو راغب کرنے کیلئے بس یاترا کے ذریعہ عوام تک پہنچنے کا فیصلہ کیا گیا ہے۔

ملگ، ورنگل، کریم نگر، نظام آباد اضلاع میں کل سے 20 اکتوبریعنی تین دن تک یہ یاترا جاری رہے گی۔، ملگ ضلع میں 18اکتوبر کو یاترا شروع ہوگی، یہ یاترا جملہ 8حلقوں میں 190 کلومیٹر کا فاصلہ طے کرے گی۔

اسی روز شام میں چار بجے رامپامندر کے درشن راہل گاندھی کریں گے۔رات میں بھوپال پلی ضلع میں بے روزگارنوجوانوں کے ساتھ ملاقات کی جائے گی۔

وہ ان نوجوانوں کے ساتھ پدیاترا کریں گے۔19اکتوبر کو سنگارینی کالریز کوئلہ کی کمپنی کے ورکرس کے ساتھ راہل گاندھی ملاقات کریں گے۔راماگنڈم سے پداپلی تک بس یاترا میں وہ حصہ لیں گے۔

پداپلی میں جلسہ سے خطاب کریں گے۔ 20 اکتوبرکو بودھن میں بیڑی کارکنوں او ر خلیجی ممالک کے متاثرہ خاندانوں سے ملاقات کے لیے راہل گاندھی بودھن سے آرمور تک بس یاترا کریں گے۔راہل گاندھی آرمورمیں ہلدی کے کسانوں کے ساتھ ملاقات کریں گے۔