کرناٹک میں سڑک حادثہ۔اے پی کے تین افرادہلاک

حیدرآباد: کرناٹک کے ضلع کولار میں سری نواس پورم کے قریب پیش آئے سڑک حادثہ میں آندھراپردیش کے تین افراد ہلاک ہوگئے۔

یہ حادثہ اُس وقت پیش آیاجب مزدوروں سے بھری ایک جیپ بے قابو ہو کر الٹ گئی جس کے نتیجہ میں آندھرا پردیش کے ضلع انامیا سے تعلق رکھنے والے تین افراد موقع پر ہی ہلاک اور 15 دیگر شدید زخمی ہو گئے۔

اطلاعات کے مطابق ضلع انامیا کے گاؤں پولاکنٹاواری پلی سے تعلق رکھنے والے تقریباً 20 مزدور کام کی تلاش میں جیپ کے ذریعہ کرناٹک جا رہے تھے کہ سرینواس پورم کے قریب یہ حادثہ پیش آیا۔

مہلوکین کی شناخت 25 سالہ سرینواسلو، 60 سالہ وینکاٹماں اور 65 سالہ منیپاکے طور پر ہوئی ہے جو سب ایک ہی گاؤں کے رہنے والے تھے۔

زخمی 15 افراد کو فوری طور پر رائل پاڈو اور مدن پلی کے اسپتالوں میں منتقل کیا گیا ہے، جہاں بعض کی حالت تشویشناک بتائی جا رہی ہے۔