تلنگانہ میں جھلسادینے والی گرمی، غیر موسمی بارش کا امکان

حیدرآباد: تلنگانہ میں گرمی کی شدت دن بہ دن بڑھتی جا رہی ہے۔ مارچ کے مہینے میں ہی زیادہ سے زیادہ درجہ حرارت ریکارڈ کیا جا رہا ہے، جس سے شدید گرمی کا اندازہ لگایا جا سکتا ہے۔ حیدرآباد سمیت مختلف اضلاع میں درجہ حرارت 40 ڈگری سینٹی گریڈ سے تجاوز کر گیا ہے۔

 محکمہ موسمیات کے مطابق، درجہ حرارت معمول سے 3.3 ڈگری زیادہ ریکارڈ کیا جا رہا ہے، جبکہ شمالی تلنگانہ کے اضلاع میں گرمی کی شدت سب سے زیادہ محسوس کی جا رہی ہے۔

ماہرین موسمیات کا کہنا ہے کہ آئندہ 10 دنوں کے دوران تلنگانہ میں موسم میں غیر متوقع تبدیلیاں دیکھنے کو مل سکتی ہیں۔ تلنگانہ کے موسمیاتی ماہرین کے مطابق، 19 مارچ تک شدید گرم ہوائیں چلتی رہیں گی، تاہم 20 مارچ سے 24 مارچ کے درمیان ریاست میں غیر موسمی بارش ہونے کا امکان ہے۔

ماہرین کا کہنا ہے کہ یہ بارشیں عام نہیں بلکہ شدید گرج چمک اور طوفانی آندھی کے ساتھ ہونے کا امکان ہے۔ چونکہ موسم میں مسلسل تبدیلی آ رہی ہے، لہٰذا کسانوں کو احتیاط برتنے کی ہدایت دی گئی ہے۔ تلنگانہ ویدر مین نے کسانوں کو مشورہ دیا ہے کہ وہ 20 مارچ کے بعد کے موسمی حالات کو مدنظر رکھتے ہوئے اپنی زرعی سرگرمیاں ترتیب دیں۔