اسرائیل کی جارحانہ پالیسیوں کے خلاف لبنان کے ساتھ ہیں: اردغان

انقرہ: صدر رجب طیب اردغان نے لبنانی وزیراعظم نجیب میقاتی سے ٹیلی فون پر رابطہ کیا ہے۔ صدارتی شعبہ اطلاعات کے مطابق، اس گفتگو میں اسرائیل کی طرف سے لبنان کے خلاف ممکنہ جارحیت،غزہ پر حملوں اور خطے میں بڑھتی ہوئی کشیدگی پر تبادلہ خیال کیا گیا ۔

علاوہ ازیں بات چیت میں صدر اردغان نے اسرائیلی حملوں کے فوری خاتمے کی ضرورت پر زور دیتے ہوئے خدشہ ظاہر کیا کہ اسرائیل کے جارحانہ اقدامات انتہائی خطرناک ہیں،ترکیہ اسرائیل کی جارحانہ پالیسیوں کے خلاف لبنان کے ساتھ ہے۔

اردغان نے مزید کہا کہ عالمی برادری اور مسلم امہ کو اب وقت ضائع کیے بغیر اسرائیل کو روکنے کی ضرورت ہے جو کہ علاقائی و عالمی امن کےلیے خطرہ بن رہاہے۔