تلنگانہ: کار شعلہ پوش،بعض افراد معمولی زخمی

حیدرآباد: تلنگانہ کے ضلع نلگنڈہ کے گنڈرام پلی کے قریب قومی شاہراہ پر ایک بڑا حادثہ ٹل گیا۔ وجئے واڑہ سے حیدرآباد آرہی ایک کار گنڈرام پلی کے مقام پر بے قابو ہوکر ڈیوائیڈر سے ٹکرا کر الٹ گئی۔

اس کے فوراً بعد گاڑی میں آگ بھڑک اٹھی اور کار مکمل طور پر جل کر خاکستر ہوگئی۔ تاہم خوش قسمتی سے گاڑی میں سوار تمام مسافر محفوظ رہے۔

اطلاع ملتے ہی پولیس موقع پر پہنچی اور امدادی کارروائیاں شروع کیں۔ معمولی زخمی ہونے والے افراد کو اسپتال منتقل کیا گیا۔ حادثہ کے باعث چٹیال تک ٹریفک جام ہوگئی جسے بعد ازاں حادثہ کی شکار کار کو ہٹاتے ہوئے بحال کیا گیا۔