ووٹرس کیلئے سوشل میڈیا کے موثر استعمال پر تلنگانہ کو دوسرا مقام

حیدرآباد: الیکشن کمیشن آف انڈیا (ای سی آئی) نے ووٹروں کی مصروفیت اور معلومات کی ترسیل کے لیے سوشل میڈیا کا مؤثر طریقہ سے فائدہ اٹھانے کے لیے تلنگانہ کو ملک میں دوسرا مقام دیا ہے۔

تلنگانہ کے چیف الیکٹورل آفیسر نے اس کامیابی کا اعلان کرتے ہوئے شفافیت، ووٹرس میں شعور بیداری اور انتخابی عمل میں ان کی شمولیت میں ریاست کی مسلسل کوششوں کو اجاگر کیا۔

ای سی آئی کی تازہ ترین رپورٹ کے مطابق، جھارکھنڈ نے سرفہرست مقام حاصل کیا، تلنگانہ کو دوسرا مقام حاصل ہوا۔سی ای او تلنگانہ نے اس کامیابی کا سہرا ایک مضبوط سوشل میڈیا حکمت عملی کو قرار دیا جس میں بروقت اپ ڈیٹس، خرافات کا پردہ فاش کرنا اور ووٹروں کے ساتھ براہ راست رابطہ شامل ہے۔

انہوں نے کہا انتخابات کے انعقاد کے علاوہ، ہمارا کردار دنیا کی سب سے بڑی جمہوریت میں شفافیت، درستگی اور جمہوری اقدار کی برقراری کو یقینی بنانے پر مرکوز رہتا ہے۔

انہوں نے کہا ہم اپنے سوشل میڈیا پلاٹ فارمس پر 3 لاکھ سے زیادہ سبسکرائبرس کے ساتھ، ووٹرس کے ساتھ مسلسل ربط رکھتے ہیں ۔ ریاست میں 2024 کے پارلیمانی انتخابات کے دوران ووٹر ٹرن آؤٹ میں 3 فیصد اضافہ دیکھا گیا، جو 2019 میں 62.77 سے بڑھ کر 66.3 فیصد ہو گیا۔