تلنگانہ: کالاجادو کا شبہ۔ قریبی رشتہ داروں کے حملہ میں جوڑازخمی

حیدرآباد: کالاجادو کے شبہ میں ایک شخص اور اس کی بیوی پر قریبی رشتہ داروں نے حملہ کرکے زخمی کردیا۔

یہ واقعہ تلنگانہ کے محبوب آباد ضلع کے ویلوبلی علاقہ میں پیش آیا۔تفصیلات کے مطابق زخمی جوڑا یوگیندر اور رادھیکا اپنے مکان میں سورہے تھے کہ ان کے رشتہ داروں کرشنا اور لکشمی نے لاٹھیوں سے ان پر حملہ کردیا۔

اس دوران اپنے شوہر کو بچانے اور مزاحمت کرنے والی رادھیکا کو بھی نشانہ بناتے ہوئے اس پر بھی حملہ کردیاگیا جس کے نتیجہ میں شوہر اور بیوی زخمی ہوگئے۔

چند سال پہلے حملہ آور کرشنا کی بیوی کی موت ہوگئی تھی تب ہی سے اس کو یوگیندرپر شبہ تھا۔اس کاماننا تھا کہ یوگیندرنے کالاجادوکرتے ہوئے اس کی بیوی کو ہلاک کیا ہے۔

اس کی مخاصمت کے طورپر اس نے یوگیندر اور اس کی بیوی پر حملہ کرتے ہوئے ان کو شدید زخمی کردیا۔

اس واقعہ میں زخمی جوڑے کو علاج کے لئے کوتہ گوڑم کے سرکاری اسپتال منتقل کیاگیا۔اس سلسلہ میں اس جوڑے کی شکایت پر پولیس نے معاملہ درج کرکے جانچ شروع کردی۔