تلنگانہ کی نکہت زرین پیرس اولمپکس میں حصہ لینے کیلئے تیار

پیرس: ہندوستانی باکسر نکہت زرین پیرس اولمپکس میں اتوار کو نارتھ پیرس ایرینا میں اپنے پہلے میچ کے لیے تیار ہیں۔ دو بار کی عالمی چیمپئن زرین ٹرائلز میں میری کوم سے ہارنے کے بعد ٹوکیو 2020 اولمپکس سے باہر ہو گئیں۔انہوں نے تب سے دو عالمی خطاب، ایک کامن ویلتھ گیمز میں گولڈ اور گزشتہ سال کے ایشین گیمز میں کانسے کے تمغے سمیت کئی اہم کامیابیاں حاصل کی ہیں۔

زرین راؤنڈ آف 32 میں جرمنی کی میکسی کیرینا کلوٹزر کے خلاف اپنی مہم کا آغاز کریں گی۔ کامیاب کارکردگی کے بعد راؤنڈ آف 16 میں ان کا مقابلہ چین کی وو یو سے ہو سکتا ہے۔

باکسر وو یو، پیرس 2024 میں خواتین کی 50 کلوگرام کیٹیگری میں ٹاپ سیڈ اور ایشین گیمز کی چیمپیئن رہنے والی، 52 کلوگرام کیٹیگری میں ورلڈ خطاب بھی اپنے نام کر چکی ہیں۔ 50 کلوگرام وزن کے زمرے میں موجودہ عالمی چیمپئن زرین کو ایک سخت چیلنج کا سامنا ہے۔

پیرس 2024 باکسنگ مقابلے کے لیے سیڈنگ کا تعین براعظمی کوالیفائرز کے نتائج سے کیا گیا تھا جس میں 13 ویٹ کیٹیگریز میں سے ہر ایک میں آٹھ باکسرز کو سیڈ ملی تھی۔ اپنے شاندار ٹریک ریکارڈ کے باوجود زرین کو سیڈ نہیں ملی۔

خواتین کی 50 کلوگرام کیٹیگری میں ٹاپ سیڈز میں الجزائر کی رومیسا بولم، ٹوکیو 2020 کی سلور میڈلسٹ ترکی کی بوسے ناز کاکیروگلو، برازیل کی باربوسا ڈی المیڈا اور آسٹریلیا کی مونیک سوراسی شامل ہیں۔

ٹاپ ایٹ میں پین امریکن گیمز کی چاندی کا تمغہ جیتنے والی امریکہ کی جینیفر لوزانو، فرانسیسی باکسر واسیلا لکدیری اور تھائی لینڈ کی چوتھامت راکسات بھی شامل ہیں۔

پیرس 2024 اولمپکس میں باکسنگ کے مقابلے 27 جولائی سے 11 اگست تک ہوں گے، ابتدائی راؤنڈز 4 اگست کو نارتھ پیرس ایرینا میں ہوں گے۔ اس کے بعد مقابلہ ایک دن کے وقفے کے بعد 06 اگست سے رولینڈ گیروس اسٹیڈیم میں منتقل ہوجائےگا۔