حیدرآباد میں TG SAFE کے دھاوے، 14 ریسٹورنٹس کے FSSAI لائسنس معطل، 8 کو نوٹس

حیدرآباد: تلنگانہ فوڈ سیفٹی اینڈ انفورسمنٹ (TG SAFE) حکام نے 31 اکتوبر کو گولکنڈہ اور چارمینار زون کے مختلف علاقوں میں معائنہ کرتے ہوئے 14 ریسٹورنٹس کے FSSAI لائسنس معطل کر دیے، جبکہ مزید 8 ہوٹلوں اور غذائی مراکز کو وجہ بتاؤ نوٹس جاری کیے گئے۔

اس کارروائی کے دوران فوڈ سیفٹی آفیسرس اور پولیس اہلکاروں پر مشتمل 22 ٹیموں نے مجموعی طور پر 22 ریسٹورنٹس اور غذائی مراکز کا معائنہ کیا۔

معائنے کے دوران کئی مقامات پر کچن میں صفائی کا ناقص انتظام، لال بیگ اور مکھیوں کی موجودگی، چوہوں کی بیٹ، سڑی ہوئی سبزیاں، زائد المیعاد غذائی اشیاء اور پھپھوندی پائی گئی۔ اس کے علاوہ کچے گوشت اور تیار شدہ کھانے کو غیر مناسب طریقے سے محفوظ رکھنے اور استعمال شدہ پکوان کے تیل کو بار بار استعمال کرنے کا بھی انکشاف ہوا۔

حکام نے یہ بھی پایا کہ بعض مقامات پر غذائی اشیاء تیار کرنے والے ملازمین ہیئر نیٹ اور دستانوں کے بغیر کام کر رہے تھے، جبکہ صفائی اور کیڑوں پر قابو پانے سے متعلق لازمی ریکارڈ بھی موجود نہیں تھا۔

اس کارروائی کے دوران 544 کلو گرام خراب اور آلودہ غذائی اشیاء تلف کر دی گئیں، جبکہ 13 کلو گرام استعمال شدہ پکوان کا تیل ضبط کرکے ضائع کیا گیا۔ مزید برآں، جانچ کے لیے 21 غذائی نمونے حاصل کیے گئے۔

جن ریسٹورنٹس کے FSSAI لائسنس معطل کیے گئے:

1. ہوٹل سری راگھویندر اُڈپی ویج، برنداون کالونی روڈ، ٹولی چوکی
2. لکی ریسٹورنٹ، سنتوش نگر
3. شاہ غوث کیفے، شالی بنڈہ
4. ہوٹل نایاب، نیاپول، چارمینار
5. سری بالاجی فیملی ڈھابہ، گوڈی ملکاپور
6. صدیق کباب سینٹرل کچن، گوڈی ملکاپور
7. السبا ہوٹل، ٹولی چوکی
8. مہفل ریسٹورنٹ، دلسکھ نگر
9. ہوٹل سری راگھویندر اُڈپی ویج، سنتوش نگر
10. ڈائن ہل ریسٹورنٹ، مساب ٹینک
11. سہیل ریسٹورنٹ، ملک پیٹ
12. ہوٹل اکشے ٹفن، ملک پیٹ
13. ہوٹل وینکٹیشورا، ایم جے آر روڈ
14. عزیزبو دی رائل عربین ریسٹورنٹ، سالارجنگ کالونی، ریتی باؤلی

جن اداروں کو وجہ بتاؤ نوٹس جاری کیے گئے:

1. تاج فلک نما پیلس، انجن باؤلی
2. ہوٹل سبزی، نزد اعتبار چوک، الیاس کوٹلہ، چارمینار
3. پستہ ہاؤس ریسٹورنٹ، شاہ علی بنڈہ
4. سویکار ہوٹل، سنتوش نگر
5. منڈی ایٹ 36 عربین کچن، چارمینار
6. گولکنڈہ ہوٹل اینڈ ریزورٹس، مساب ٹینک
7. امپیریل ملٹی کیوزین ریسٹورنٹ، ٹولی چوکی
8. طیبہ بیکری، بازار گھاٹ مین روڈ، لکڑی کا پل

حکام کے مطابق یہ کارروائی شہر میں غذائی اشیاء کے معیار اور صفائی کے اصولوں پر عمل درآمد کو یقینی بنانے اور عوام کو محفوظ کھانا فراہم کرنے کی کوششوں کا حصہ ہے۔