چند دن کے بحران سے 19 سالہ ایئرلائن کو نہ پرکھا جائے، بدترین وقت اب ختم ہوچکا: انڈیگو سی ای او

انڈیگو ایئرلائن کے چیف ایگزیکٹیو آفیسر پیٹر ایلبرز نے کہا ہے کہ کمپنی کے لیے مشکل ترین وقت اب ختم ہوچکا ہے اور 19 سالہ ایئرلائن کو صرف چند دنوں کے بحران کی بنیاد پر نہیں پرکھا جانا چاہیے۔

ملازمین کے نام جاری کیے گئے ایک ویڈیو پیغام میں سی ای او نے مشکل حالات میں تعاون پر ٹیم کا شکریہ ادا کرتے ہوئے کہا کہ اب صورتحال قابو میں ہے۔ ان کے مطابق، اس وقت انڈیگو روزانہ تقریباً 2,200 پروازیں چلا رہی ہے، جو ٹیم ورک اور اجتماعی کوششوں کا نتیجہ ہے۔

پیٹر ایلبرز نے بتایا کہ کمپنی آئندہ تین اہم پہلوؤں پر توجہ مرکوز کرے گی، جن میں ادارے کو مضبوط بنانا، بحران کی بنیادی وجوہات کا تجزیہ اور تنظیمی سطح پر اصلاحات شامل ہیں۔ انہوں نے کہا کہ دسمبر کے پہلے ہفتے میں پیدا ہونے والی صورتحال کی جانچ کے لیے ایک غیر ملکی ماہر کو مقرر کیا گیا ہے، جو مختلف مقامات کا دورہ کرے گا اور ملازمین سے بات چیت بھی کرے گا۔

سی ای او کا کہنا تھا کہ ملازمین کی آرا اور بنیادی وجوہات کے تجزیے کی بنیاد پر انڈیگو پہلے سے زیادہ مضبوط اور بہتر انداز میں آگے بڑھے گی۔ انہوں نے واضح کیا کہ گزشتہ 19 برسوں میں بننے والے ادارے کو صرف تین دن، یعنی 3 سے 5 دسمبر کے واقعات سے نہیں ناپا جانا چاہیے۔

واضح رہے کہ 3 سے 5 دسمبر کے دوران انڈیگو کو بڑی تعداد میں پروازیں منسوخ کرنا پڑیں، جن میں سب سے زیادہ 5 دسمبر کو تقریباً 1500 پروازیں شامل تھیں۔ کمپنی نے اس کی وجہ پائلٹوں کی فلائٹ ڈیوٹی سے متعلق نئے قواعد اور روسٹرنگ میں ناکامی کو قرار دیا تھا۔

ادھر حکومت نے اس پورے معاملے کی جانچ کے لیے ایک اعلیٰ سطحی کمیٹی تشکیل دی ہے، جبکہ انڈیگو کو رات کی پروازوں کے قوانین میں عارضی رعایت بھی دی گئی ہے۔

ویڈیو پیغام میں انڈیگو انتظامیہ نے کہا کہ بحران کے باوجود کمپنی نے خود کو سنبھال لیا ہے اور اب اس کا سفر آگے اور اوپر کی جانب ہی ہوگا۔