تلنگانہ کے نیلوتلا گاؤں کی سرپنچ کو یوم جمہوریہ کے موقع پر صدر جمہوریہ نے ایٹ ہوم کیلئے مدعو کیا

حیدرآباد: تلنگانہ کے ضلع جنگاوں کے نیلوتلا گاؤں کی سرپنچ سی سروپا رانی کو یوم جمہوریہ کے موقع پر صدر جمہوریہ نے راشٹرپتی بھون میں ہونے والے ایٹ ہوم کیلئے مدعو کیا۔

تلنگانہ کے پنچایت راج کمشنر کو مرکزی وزارت پنچایت راج سے اس سلسلہ میں انتظامات کرنے کی ہدایات موصول ہوئی ہیں۔

نیلوتلا پنچایت کو سال 2021-22 کے لیے آبی وسائل کی ترقی کے پروگراموں کو کامیابی سے چلانے اور پانی کی کفایت کے زمرہ میں قومی ایوارڈ ملا ہے۔

سرپنچ سروپا رانی نے گزشتہ سال منعقدہ ایک پروگرام میں صدر دروپدی مرمو کے ہاتھوں سے یہ ایوارڈ حاصل کیا تھا۔ صدرجمہوریہ نے سرپنچ کو راشٹرپتی بھون ایٹ ہوم پر مدعو کیا۔

ملک کے صرف آٹھ سرپنچوں کو یہ موقع ملا۔ سرپنچ نے کہا کہ انہیں اس سلسلہ میں دعوت نامہ موصول ہوا ہے۔

مرکزی حکومت کی جانب سے گزشتہ سال مختلف زمروں میں جن 46 قومی ایوارڈس کا اعلان کیا گیا تھا، ان میں آبی وسائل کی ترقی کے لیے قومی سطح کا ایوارڈ دیاگیا تھا۔