تلنگانہ میں خودداری اور وقار کی جدوجہد جاری: کویتا

حیدرآباد: تلنگانہ جاگروتی کی صدر کویتا نے کہا کہ جس طرح فرانسیسی انقلاب نے آمرانہ نظام کو گرا کر عوامی بیداری پیدا کی، اسی طرح تلنگانہ میں بھی خودداری اور وقار کے لئے جدوجہد جاری ہے۔

وہ ورنگل ضلع میں جاری ”جنم باٹا” پروگرام کے دوسرے دن پیدل مارچ کے دوران میڈیا سے بات کر رہی تھیں۔ کویتا نے الزام لگایا کہ میڈارم مندر سے متعلق کاموں کے ٹنڈرس میں سنگین بے ضابطگیاں ہو رہی ہیں۔

انہوں نے کہا کہ وزیراعلیٰ ریونت ریڈی کے دورہ کو 15 دن گزر چکے ہیں، مگر متاثرہ لوگوں کو تاحال معاوضہ نہیں ملا۔

کویتا نے مزید کہا کہ جب بی آر ایس حکومت میں تھی، تب بھی وہ وزیر اعلیٰ کی بیٹی ہوتے ہوئے کئی کام مکمل نہیں کروا سکیں۔ انہوں نے کہا کہ متحدہ ورنگل ضلع میں کئی مسائل ہیں، جنہیں جاننے کے بعد حکومت پر دباؤ ڈال کر ان کے حل کی کوشش کی جائے گی۔

کویتا نے الزام عائد کیا کہ حکومت نے ورنگل کے ایم جی ایم اسپتال کو نظر انداز کر دیا ہے۔ ساتھ ہی انہوں نے یہ بھی کہا کہ نئے ورنگل سوپراسپیشیلٹی اسپتال کی تعمیراتی لاگت 1100 کروڑ سے بڑھ کر 1700 کروڑ روپے کیسے ہوئی، اس کی وضاحت حکومت کو کرنی چاہیے۔