حیدرآباد میں کانگریس کے جلسہ کی کامیابی کارکنوں اورلیڈران کی محنت کا نتیجہ: مہیش کمار گوڑ

حیدرآباد: تلنگانہ پردیش کانگریس کمیٹی (ٹی پی سی سی) کے صدر مہیش کمار گوڑ نے کہا ہے کہ گزشتہ روز حیدرآباد میں منعقدہ جلسہ کی شاندار کامیابی ہر کانگریس کارکنوں اور لیڈران کی انتھک محنت کا نتیجہ ہے۔ انہوں نے تمام کارکنوں کا شکریہ ادا کیا اور کہا کہ یہ کامیابی اجتماعی کوششوں کا نتیجہ ہے۔

انہوں نے اپنے بیان میں کہا کہ اس جلسہ کو کامیاب بنانے کے لیے کارکنوں سے لے کر ریاستی سطح کے لیڈرن تک سب نے بے لوث کام کیا۔ ریاست کے کونے کونے سے کانگریس لیڈران اور کارکنان نے اجلاس میں حصہ لیا جو پارٹی کی مقبولیت اور اتحاد کا مظہر ہے۔

انہوں نے خصوصی طور پر اے آئی سی سی صدر ملکارجن کھرگے، جنرل سکریٹری کے سی وینو گوپال اور وزیر اعلیٰ ریونت ریڈی کا شکریہ ادا کیا، جنہوں نے جلسہ میں شرکت کر کے پارٹی کیڈر کو نیا جوش و حوصلہ دیا۔

انہوں نے کہا کہ اے آئی سی سی انچارج میناکشی نٹراجن، نائب وزیر اعلیٰ بھٹی وکرامارکا، سکریٹری وشواناتھن اور دیگر وزراء نے بھی بھرپور شرکت کے ذریعہ پارٹی کو مضبوط پیغام دیا۔

مہیش کمار گوڑ نے جلسہ کی کامیابی میں اہم کردار ادا کرنے والے منڈل صدور، بلاک لیڈران، ڈی سی سی صدور، ارکانِ پارلیمان، ارکانِ اسمبلی و کونسل، حلقہ انچارج، ٹی پی سی سی نائب صدور و جنرل سکریٹریز کا بھی تہہ دل سے شکریہ ادا کیا۔