نوجوانوں نے سی پی آر دے کر بندر کی جان بچائی

حیدرآباد: ضلع محبوب آباد کے کوٹہ گوڑہ علاقہ میں انسانیت کی زندہ مثال سامنے آئی، جہاں دو مقامی نوجوانوں نے بے ہوشی کی حالت میں پڑے ایک ننھے بندر کو سی پی آر دے کر اس کی جان بچائی۔

تفصیلات کے مطابق کوٹہ گوڑہ میں بندروں کی تعداد دیگر علاقوں کے مقابلے زیادہ ہے۔ شام کے وقت دو گروہوں کے درمیان جھگڑا ہوا، جس کے دوران ایک ننھا بندر خوفزدہ ہوکر بجلی کے کھمبے پر چڑھ گیا۔

وائر پکڑنے کے سبب اسے بجلی کا جھٹکا لگا اور وہ نیچے گر پڑا۔یہ منظر دیکھ کر مقامی نوجوان سری کانت اور کرشن بغیر کسی خوف کے زخمی اور بے ہوش بندر کو وہاں سے اٹھا کر ایک طرف لے گئے اور فوری طور پرسی پی آر (دل و پھیپھڑوں کی بحالی کا طریقہ) دینا شروع کیا جس کے نتیجہ میں اس ننھے بند ر کوہوش آگیا۔

آج کے اس دور میں جہاں اکثر لوگ انسانوں کی بھی پروا نہیں کرتے، وہاں ان دونوں نوجوانوں نے جان کے خطرے کے باوجود دوسرے بندروں کے ممکنہ حملے کی پروا ہ کئے بغیر اس جانور کی جان بچائی۔ ان کی اس بہادری اور انسانیت پسندی پر مقامی لوگوں نے انہیں بھرپور انداز میں سراہا اور خراجِ تحسین پیش کیا۔