دہلی یونیورسٹی میں قانون کے طلبہ کو منواسمرتی پڑھانے کا سوال ہی نہیں: دھرمیندرپردھان

نئی دہلی: دہلی یونیورسٹی کے قانون کے طلبہ کو منواسمرتی پڑھانے کی تجویز پر تنازعہ کے بیچ مرکزی وزیرتعلیم دھرمیندرپردھان نے جمعہ کے دن کہا کہ نصاب میں کسی کتاب کا کوئی متنازعہ حصہ شامل کرنے کا سوال ہی نہیں۔

انہوں نے کہا کہ دہلی یونیورسٹی کے وائس چانسلرجوگیش سنگھ خود جمعرات کو یہ تجویز مستردکرچکے ہیں۔ حکومت دستور کی اسپرٹ برقرار رکھنے کی پابند ہے۔ دھرمیندرپردھان نے حیدرآباد میں میڈیا سے کہاکہ کل ہمارے پاس کچھ جانکاری آئی تھی کہ منواسمرتی ڈی یو لاء فیکلٹی کورس کا حصہ بنے گی۔

میں نے وائس چانسلر سے بات چیت کی۔ وائس چانسلر نے جواب دیاکہ لاء فیکلٹی کے کسی رکن نے جیورس پروڈینس چاپٹر میں بعض تبدیلیاں تجویز کی تھیں لیکن اکیڈیمک کونسل اسی کسی تجویز پر مہر نہیں لگائی۔

وائس چانسلر نے خود کل ہی اس تجویز کو مستردکردیا۔ دھرمیندرپردھان نے کہا کہ ہم دستور کے پابند ہیں۔ کسی کتاب کا کوئی متنازعہ حصہ شامل کرنے کا سوال ہی پیدا نہیں ہوتا۔ دہلی یونیورسٹی کے ایل ایل بی طلبہ کو منواسمرتی (منو کے قوانین) پڑھائے  جانے کی تجویز پر جمعہ کو اکیڈمک کونسل کی میٹنگ میں تبادلہ خیال ہونے والا تھا۔

 بعض اساتذہ نے اس پر تنقید کی تھی۔ فیکلٹی آف لاء نے ڈی یو کے اعلیٰ ترین فیصلہ ساز ادارہ سے نصاب پر نظرثانی اور سالِ اول اور سال سوم کے طلبہ کو منواسمرتی پڑھانے کی اجازت مانگی تھی۔ یونیورسٹی وائس چانسلر نے جمعہ کے دن وضاحت کی تھی تجویز مسترد کردی گئی اور طلبہ کو منواسمرتی نہیں پڑھائی جائے گی۔