ویڈیوـ: پینٹنگ کو سڑک سمجھ کر ڈرائیور نے کنٹینردیوار پر چڑھا دیا

نئی دہلی: سوشل میڈیا پر ان دنوں ایک ویڈیو تیزی سے وائرل ہورہا ہے، جس میں ایک ٹرک ڈرائیور نے سڑک کے کنارے بنی حقیقت سے قریب نظر آنے والی پینٹنگ کو اصل راستہ سمجھ لیا اور ٹرک اسی سمت میں آگے بڑھا دیا۔ وائرل پوسٹ کے کیپشن کے مطابق یہ واقعہ دہلی۔دہرادون ایکسپریس وے پر پیش آیا ہے۔

پینٹنگ نے پیدا کیا نظروں کا دھوکہ

وائرل ویڈیو میں دیوار پر بنائی گئی ایک ایسی پینٹنگ نظر آرہی ہے، جس میں سڑک، درختوں اور اطراف کے مناظر کو اس انداز میں پیش کیا گیا ہے کہ پہلی نظر میں وہ ایک حقیقی راستہ معلوم ہوتے ہیں۔ پینٹنگ میں سڑک کا حصہ اور دور تک جاتا ہوا منظر اتنا حقیقی دکھائی دیتا ہے کہ ڈرائیور اسے اصل راستہ سمجھ بیٹھا۔

ویڈیو میں ٹرک دیوار پر چڑھا ہوا دکھائی دیتا ہے، جبکہ کچھ لوگ اس کے قریب پہنچ کر صورتحال کا جائزہ لیتے نظر آتے ہیں۔ ویڈیو کے مطابق کم روشنی یا صبح کے وقت منظر واضح نہ ہونے کی وجہ سے ڈرائیور کو اصل راستے اور پینٹنگ کے درمیان فرق سمجھنے میں دشواری ہوئی ہوگی۔

سوشل میڈیا پر دلچسپ تبصرے

ویڈیو سامنے آنے کے بعد سوشل میڈیا صارفین مختلف تبصرے کررہے ہیں۔ بعض افراد پینٹنگ بنانے والے فنکار کی مہارت کی تعریف کررہے ہیں اور ان کا کہنا ہے کہ تصویر اتنی حقیقت سے قریب ہے کہ اسے اصل راستہ سمجھنے کی غلطی ہوسکتی ہے۔ دوسری جانب، کچھ صارفین نے اسے سڑک کی حفاظت سے جوڑتے ہوئے کہا کہ ایکسپریس وے جیسے تیز رفتار راستوں کے اطراف بنائے جانے والے ڈیزائن ایسے ہونے چاہئیں کہ ڈرائیور کسی غلط فہمی کا شکار نہ ہوں۔

یہ ویڈیو جہاں فنکار کی مہارت کو نمایاں کرتی ہے، وہیں سڑکوں کے اطراف بنائے جانے والے تھری ڈی اور حقیقت سے قریب نظر آنے والے ڈیزائنوں کے ممکنہ اثرات پر بھی توجہ دلاتی ہے۔