جموں و کشمیر میں دو دہشت گرد سے ترکی کا بنا ہوا پستول برآمد

سرینگر (آئی اے این ایس) جموں و کشمیر کے ضلع بارہمولہ میں فورسز نے جمعرات کو ہتھیاروں اور گولہ بارود کے ساتھ دو دہشت گرد معاونین کو گرفتار کر لیا ہے۔ عہدیداروں نے بتایا کہ خفیہ اطلاعات کی بنیاد پر کارروائی کرتے ہوئے 52 راشٹریہ رائفلز اور جموں و کشمیر پولیس نے بارہمولہ کے دلینا گھاٹ کے دار پورہ نرسری علاقے سے ان دونوں کو گرفتار کیا۔

تلاشی کے دوران ان کے قبضے سے ترکی کا بنا ہوا ایک پستول، ایک میگزین، 10 راؤنڈ گولہ بارود اور دو آئی ای ڈی (IEDs) برآمد کیے گئے۔ یہ دونوں افراد سوپور سب ڈویژن کے چنکی پورہ علاقے کے رہنے والے ہیں اور وہ اوور گراؤنڈ ورکرز (OGWs) کے طور پر کام کر رہے تھے۔

عہدیداروں نے کہا،”ان کے دہشت گردوں کے لیے ہتھیاروں اور دھماکہ خیز مواد کی نقل و حرکت میں ملوث ہونے کا امکان ہے۔ اس سلسلے میں مزید تفتیش شروع کر دی گئی ہے اور جیسے جیسے تحقیقات آگے بڑھے گی، مزید تفصیلات سامنے آئیں گی۔“ اوور گراؤنڈ ورکرز (OGWs) اور دہشت گردوں کے معاونین دراصل سویلین نیٹ ورک کا حصہ ہوتے ہیں جو براہ راست جنگ میں حصہ لیے بغیر دہشت گرد گروہوں کی حمایت کرتے ہیں۔

یہ وہ افراد ہیں جو مقامی برادریوں کے اندر خفیہ طور پر کام کرتے ہیں تاکہ لشکر طیبہ، جیش محمد اور حزب المجاہدین جیسی کالعدم دہشت گرد تنظیموں کو کام کرنے کے لیے ضروری بنیادی ڈھانچہ، وسائل اور معلومات فراہم کر سکیں۔ جہاں روایتی طور پر ”اوور گراؤنڈ ورکرز“ سے مراد وہ افراد ہوتے ہیں جو صرف لاجسٹک یا مادی امداد فراہم کرتے ہیں، وہیں سیکورٹی ایجنسیاں اکثر ایسے افراد کے لیے دہشت گرد معاونین”یا ”ہائبرڈ دہشت گرد“ کی اصطلاحات استعمال کرتی ہیں جو فعال کارروائیوں جیسے کہ ہتھیار سنبھالنے، ٹارگٹ کلنگ کرنے یا دھماکہ خیز مواد منتقل کرنے میں بھی شامل ہو جاتے ہیں۔

عہدیداروں کے مطابق، یہ دونوں OGWs اور دہشت گرد معاونین اس علاقے میں سرگرم عسکریت پسندوں کو پناہ گاہیں، خفیہ ٹھکانے اور خوراک فراہم کرتے ہیں۔ وہ سرحد پار سے اسمگل کیے گئے یا ڈرونز کے ذریعے گرائے گئے غیر قانونی ہتھیار، گولہ بارود، آئی ای ڈی (دھماکہ خیز مواد) اور رقوم کی نقل و حمل اور تقسیم بھی کرتے ہیں۔ اس کے علاوہ، وہ سیکورٹی فورسز (پولیس، فوج، سی آر پی ایف) کی نقل و حرکت کے بارے میں حقیقی وقت پر معلومات اکٹھا کرتے ہیں یا مخصوص اہداف کی نگرانی کرتے ہیں۔

عہدیداروں نے مزید بتایا کہ یہ معاونین یا اوور گراؤنڈ ورکرز ڈیجیٹل پلیٹ فارمز، انکرپٹڈ ایپس اور سوشل میڈیا کا استعمال کرتے ہوئے مقامی نوجوانوں کو عسکریت پسندی کی طرف راغب کرتے ہیں اور انتہا پسندانہ نظریات پھیلاتے ہیں۔ وہ سیکورٹی فورسز کی کارروائیوں سے دھیان ہٹانے کے لیے سنگ باری، ہجوم کے ہنگاموں اور مقامی سطح پر امن و امان کے مسائل پیدا کرنے میں بھی حصہ لیتے ہیں یا انہیں منظم کرتے ہیں۔