امریکی صدر ڈونلڈ ٹرمپ مئی میں چین کا دورہ کریں گے

نئی دہلی: امریکی صدر ڈونالڈ ٹرمپ 14-15 مئی کو بیجنگ کا دورہ کریں گے، جہاں وہ اپنے چینی ہم منصب شی جن پنگ کے ساتھ ایک چوٹی کانفرنس میں شرکت کریں گے۔

امریکی صدر نے جمعرات کو اعلان کیا کہ چینی صدر بھی اس سال کے آخر میں امریکہ کا دورہ کریں گے۔ مسٹر ٹرمپ نے کہا کہ وہ مسٹر جن پنگ سے ملاقات کے بے حد منتظر ہیں، جو یقیناً ایک یادگار واقعہ ہوگا۔

دونوں صدور کے درمیان یہ اعلیٰ سطحی ملاقات پہلے 31 مارچ سے 2 اپریل تک ہونی تھی لیکن ایران پر امریکی اسرائیلی حملے کے باعث ملتوی کر دی گئی تھی۔

مسٹر ٹرمپ نے اپنے سوشل میڈیا پلیٹ فارم پر کہا، "میری چین کے معزز صدر شی جن پنگ کے ساتھ ملاقات کو ری شیڈول کر دیا گیا ہے اور یہ 14 اور 15 مئی کو بیجنگ میں ہوگی۔ محترمہ میلانیا اور میں اس سال کے آخر میں واشنگٹن میں مسٹر جن پنگ اور میڈم پینگ کی میزبانی بھی کریں گے۔”

ذرائع نے بتایا کہ مسٹر ٹرمپ اور مسٹر جن پنگ کے درمیان ہونے والی چوٹی کانفرنس میں دو طرفہ تعلقات کو مستحکم کرنے اور کئی اہم بین الاقوامی مسائل پر توجہ مرکوز کرنے کی امید ہے۔ بات چیت کا مقصد درآمدی محصولات، تجارتی معاہدوں نیز زراعت اور ہوائی جہاز کے پرزوں جیسے مخصوص شعبوں کے حوالے سے تناؤ کو کم کرنا ہے۔

اعلی ترجیحی موضوعات میں تائیوان، علاقائی سلامتی اور مغربی ایشیا کی صورتحال شامل ہیں۔ کمپیوٹر چپس، نایاب زمینی عناصر اور منشیات سے متعلق خدشات پر بھی بات چیت متوقع ہے۔

دریں اثنا، مسٹر ٹرمپ نے مغربی ایشیا میں تنازعات کی وجہ سے عالمی توانائی کی سپلائی چین میں رکاوٹوں کے درمیان آبنائے ہرمز کو محفوظ بنانے میں چین سے تعاون طلب کیا ہے۔

ذرائع نے بتایا کہ یہ دورہ اس لیے تبدیل کیا گیا کیونکہ مسٹر ٹرمپ کو ایران کے خلاف فوجی کارروائیوں کی نگرانی کے لیے واشنگٹن میں رہنے کی ضرورت تھی۔

وائٹ ہاؤس کی پریس سکریٹری کیرولین لیویٹ نے بھی اعلان کیا کہ مسٹر ٹرمپ اور خاتون اول میلانیا ٹرمپ 2026 میں واشنگٹن میں صدر شی جن پنگ اور میڈم پینگ لیوآن کی میزبانی کریں گے۔