وینزوئیلا کی امریکی حملے میں 100 افراد کے ہلاک ہونے کی تصدیق

کراکس: وینزویلا نے پہلی بار سرکاری سطح پر امریکی حملے میں 100 افراد کے ہلاک ہونے کی تصدیق کی ہے۔

وینزوئیلا کے وزیر داخلہ ڈیوسڈاڈو کابیلو نے کہا کہ کراکس میں امریکہ کی جانب سے صدر مادورو کو گرفتار کرنے کے دوران حملوں میں 100 افراد ہلاک اور درجنوں زخمی ہوئے۔

اپنے بیان میں انہوں نے کہا کہ ہمارے ملک پر امریکی حملہ بہت خوفناک تھا، صدر مادورو اور انکی اہلیہ سِیلیا فلوریس بھی امریکی حملے میں زخمی ہوئے۔

کابیلو نے کہا کہ امریکی کارروائی کے دوران صدر نکولس مادورو کی اہلیہ سِیلیا فلورس کو سر پر چوٹ آئی جبکہ صدر مادورو کو ٹانگ میں شدید چوٹ آئی۔ اِس وقت دونوں امریکی حراست میں ہیں۔

اِس اعلان سے قبل وینزوئیلا نے ہلاکتوں کی جامع تعداد فراہم نہیں کی تھی، غیرملکی میڈیا کا کہنا تھا کہ امریکی حملے میں وینزوئیلا کے 24 فوجی اہلکار اور وینزوئیلا میں کام کرنے والے کیوبا کے 32 اہلکار و پولیس افسران مارے گئے ہیں۔

اسی طرح امریکی حکام نے ایک اندازے کے مطابق بتایا تھا کہ وینزوئیلا میں فوجی کارروائی میں تقریباً 75 افراد ہلاک ہوئے ہیں۔

واضح رہے کہ 3 جنوری کو امریکی اسپیشل فورسز نے وینزوئیلا کے صدر نکولس مادورو کو کراکس میں رات کے وقت چھاپہ مار کر گرفتار کیا تھا۔