دل چھو لینے والی محبت کی کہانی۔ بیوی کی 10 سالہ خواہش پوری (ویڈیو وائرل)

مہاراشٹرا: "محبت کی کوئی عمر نہیں ہوتی” — یہ بات ایک بار پھر سچ ثابت ہوئی مہاراشٹر کے چھترپتی سنبھاجی نگر شہر میں، جہاں ایک 90 سالہ غریب بزرگ نے اپنی بیوی کو منگل سوتر (سونے کا روایتی ہار) دلانے کی تمنا ظاہر کی۔ لیکن ان کے پاس گہنا خریدنے کے لیے پیسے نہیں تھے۔ جذبات سے لبریز اس منظر نے جویلری شاپ کے مالک کو بھی رُلا دیا، جس نے صرف 20 روپے میں سونے کا منگل سوتر بزرگ کو دے دیا۔

دل چھو لینے والی محبت کی کہانی

یہ واقعہ جالنا ضلع کے ایک چھوٹے سے گاؤں "امبھورا جہانگیر” سے تعلق رکھنے والے بزرگ جوڑے شندے اور ان کی اہلیہ شانتابائی کا ہے۔ یہ دونوں عام کسان ہیں اور اس وقت "آشھاڑھی ایکادشی” کے موقع پر پانڈھرپور کی پیدل یاترا پر نکلے ہیں۔ شانتابائی گزشتہ دس سالوں سے منگل سوتر پہننے کی خواہش رکھتی تھیں، لیکن غربت کے باعث وہ خواب صرف خواہش تک محدود رہا۔

چار دکانوں سے نکال دیا گیا

شانتابائی اور ان کے شوہر نے منگل سوتر خریدنے کے لیے شہر کی چار زیور کی دکانوں کا رخ کیا، لیکن ہر جگہ انہیں نظرانداز کیا گیا، اور انہیں باہر نکال دیا گیا۔ مایوس جوڑا جب "گوپیکا جیولرز” نامی دکان پر پہنچا تو وہاں کا ماحول مختلف تھا۔ دکان کے مالک نیلیش خیونسرہ نے ان کی کہانی سنی، ان کے پاس موجود صرف 1120 روپے دیکھے، اور ان کے درمیان محبت کو محسوس کیا۔

نیلیش نے جذبات میں آکر کہا:
"آپ دونوں کا پیار ہی اصل زیور ہے، میرے لیے یہ منافع سے بڑھ کر ہے۔ آپ کا اور پاندُرنگ (بھگوان) کا آشیرواد میرے لیے سب کچھ ہے۔”

یہ کہتے ہوئے نیلیش نے بزرگ جوڑے کو صرف 20 روپے میں اصلی سونے کا منگل سوتر دے دیا۔

بزرگ جوڑے کی حالت زندگی

یہ جوڑا اب چھترپتی سنبھاجی نگر کے گجانن مہاراج مندر کے علاقے میں رہائش پذیر ہے، جہاں وہ بھیک مانگ کر گزارا کرتے ہیں۔ ان کے تین بچے ہیں — دو بیٹے اور ایک بیٹی۔ ان میں سے ایک بیٹے کا چند سال پہلے انتقال ہو چکا ہے، جبکہ دوسرا بیٹا مالی حالت کے باعث والدین کی دیکھ بھال سے قاصر ہے۔ اسی لیے یہ بزرگ جوڑا خودکفیل بن کر گزر بسر کر رہا ہے۔

ویڈیو وائرل، سنار کی تعریف

یہ سارا واقعہ ایک راہگیر نے ویڈیو میں قید کر لیا، جو دیکھتے ہی دیکھتے سوشل میڈیا پر وائرل ہو گیا۔ لاکھوں افراد اس ویڈیو کو دیکھ کر جذباتی ہو گئے اور سنار کی انسانیت اور ہمدردی کی بھرپور تعریف کی۔