خانقاہ قادریہؒ رائچور اور حضرت نظام الدین قبلہ نُماںؒ میں آثار شریفہ کی زیارت

محبوب نگر: جنوبی بھارت کے ممتاز عالم دین مولانا محمد محسن پاشاہ انصاری نے خانقاہ قادریہؒ رائچور اور نارائن پیٹ مکھتل میں آثار شریفہ اور تبرکات کی زیارت کے موقع پر خطاب کیا۔ اس تقریب میں ہزاروں مرد و خواتین نے شرکت کی اور شرف زیارت حاصل کیا۔

مولانا محمد محسن پاشاہ انصاری نے کہا کہ آپ صل اللہ علیہ وعلیٰ آلہ و صحبہ وسلم تمام کائنات کی تخلیق کا سبب ہیں اور تابوت سکینہ میں موجود مختلف انبیاء کرام کی تبرکات کو قوم بنی اسرائیل نے برکت اور کامیابی کے لیے وسیلہ بنایا۔ آپؐ نے اپنے موئے مبارکہ کی تقسیم کا حکم دیا، جس سے خیر و برکت حاصل کرنے کی تاکید کی۔

اس موقع پر قابل ذکر تبرکات میں موئے مبارکہؐ، زُلفِ مصطفیٰؐ، غلاف کعبہ کا حصہ، جنگ اُحد میں دندان مصطفیٰؐ شہید ہونے کی جگہ کا پتھر، اور خلفائے راشدین کے ریش و زلف شامل تھے۔ یہ زیارت حضرت سید شاہ عارف قادری، جناب محمد حنیف چشتی، اور دیگر مہمانان خصوصی کی موجودگی میں منعقد کی گئی۔

اس تقریب کا اہتمام حافظ محمد سہیل نظامی چشتی قادری کی وساطت سے کیا گیا۔ مولانا محمد محسن پاشاہ کی نگرانی میں خدام آثار شریفہ نے اس اہم تقریب کو کامیابی سے ہمکنار کیا، جہاں حاضرین نے آثار شریفہ و تبرکات کی زیارت کا شرف حاصل کیا۔