وقف ترمیمی بل2024، پارلیمانی کمیٹی کا آج اجلاس

نئی دہلی: پارلیمنٹ کے سرمائی اجلاس کا آغاز اس ہفتہ کے شروعات میں ہنگاموں کے درمیان ہوا، جس کی وجہ سے لوک سبھا اور راجیہ سبھا دونوں کو ملتوی کر دیا گیا۔ اب، وقف (ترمیمی) بل 2024 پر مشترکہ پارلیمانی کمیٹی (جے پی سی) آج چہارشنبہ کو اجلاس منعقد کرے گی، اور اراکین ممکنہ طور پر مجوزہ قانون میں اپنی ترمیمات پیش کریں گے۔ 

مشترکہ پارلیمانی کمیٹی کے اپوزیشن اراکین نے لوک سبھا اسپیکر اوم برلا سے کمیٹی کی مدت میں توسیع کی درخواست کی تھی۔ پہلے، بھارتیہ جنتا پارٹی (بی جے پی) کے رہنما وی مرلی دھرن نے پیر کو وقف (ترمیمی) بل پر اپوزیشن جماعتوں کو تنقید کا نشانہ بناتے ہوئے کانگریس اور کمیونسٹ جماعتوں پر "دوہری حکمت عملی” اختیار کرنے کا الزام لگایا تھا۔ 

انہوں نے کہا: "کانگریس اور کمیونسٹ پارٹیاں وقف بل کے مسئلہ پر دوہری حکمت عملی اپنائے ہوئے ہیں۔ کیرالہ اور کوچین میں، جہاں عیسائی اور ماہی گیر کمیونٹی اپنی زمینوں کے حقوق کے لیے احتجاج کر رہے ہیں، وہاں سی پی ایم اور کانگریس کے رہنما ان کی حمایت کرتے ہیں۔ لیکن جب یہ دہلی پہنچتے ہیں، تو وہ لوگوں کے جائیداد کے حقوق کی مخالفت کرتے ہیں…” 

دوسری جانب، آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی نے اس بل کو آئین کے آرٹیکل 26 کی "سنگین خلاف ورزی” قرار دیا۔ 

اویسی نے پیر کو دیگر اپوزیشن اراکین پارلیمنٹ اور لوک سبھا اسپیکر اوم برلا سے ملاقات کے بعد یہ بیان دیا اور مشترکہ پارلیمانی کمیٹی (جے پی سی) کی مدت میں توسیع کے اپنے مطالبہ کیا۔ 

بل کی خامیوں کو بیان کرتے ہوئےاسداویسی نے الزام لگایا کہ حکومت یہ بل وقف بورڈ کو مضبوط کرنے کے بجائے اسے ختم کرنے کے ارادے سے لا رہی ہے۔ انہوں نے اس بل کے پیچھے حکومت کی "نیت” پر سوال اٹھایا۔ 

22 اگست سے، وقف (ترمیمی) بل 2024 پر مشترکہ پارلیمانی کمیٹی نے کئی اجلاس منعقد کیے ہیں، چھ وزارتوں اور تقریباً 195 تنظیموں کے کام کا جائزہ لیا ہے۔  ان میں سے، 146 تنظیموں کو ملک بھر میں سنا گیا، اور سکریٹریٹ کو وقف بل سے متعلق تقریباً 95 لاکھ تجاویز موصول ہوئیں۔ 

1995 کا وقف ایکٹ، جو وقف جائیدادوں کو منظم کرنے کے لیے بنایا گیا تھا، طویل عرصے سے بدانتظامی، کرپشن اور تجاوزات کے الزامات کا سامنا کر رہا ہے۔  وقف (ترمیمی) بل 2024 میں جامع اصلاحات کی تجویز دی گئی ہے، جن میں ڈیجیٹلائزیشن، سخت آڈٹ، شفافیت، اور غیر قانونی طور پر قبضہ شدہ جائیدادوں کو دوبارہ حاصل کرنے کے لیے قانونی طریقہ کار شامل ہیں۔ 

جے پی سی مختلف ریاستوں اور یونین ٹیریٹریز کے سرکاری عہدیداروں، قانونی ماہرین، وقف بورڈ کے اراکین، اور کمیونٹی کے نمائندوں سے ان پٹ حاصل کرنے کے لیے اجلاس منعقد کر رہی ہے، تاکہ سب سے جامع اصلاحات ممکن ہو سکیں۔