پٹرول کے بجائے پانی، پمپ پر موٹر سائیکل سواروں کا احتجاج(ویڈیو وائرل)

حیدرآباد: رنگا ریڈی ضلع کے ہستینا پورم علاقہ میں واقع ایچ پی پیٹرول اسٹیشن پر پیٹرول میں پانی ملنے کی وجہ سے گاڑی چلانے والوں میں تشویش کی لہر دوڑ گئی۔ موٹرسائیکل سواروں نے جب پیٹرول میں پانی پایا تو فوراً اسٹیشن کے مالک چندر شیکھر سے وضاحت طلب کی، جنہوں نے مبینہ طور پر غیر مناسب رویہ اختیار کیا۔

موٹرسائیکل سواروں نے اسٹیشن پر پہنچ کر احتجاج کیا اور مطالبہ کیا کہ پیٹرول اسٹیشن کو سیل کیا جائے اور ان کے نقصانات کا معاوضہ ادا کیا جائے۔ گاڑی مالکان کا کہنا ہے کہ پانی کی آمیزش کی وجہ سے ان کی گاڑیاں خراب ہوگئی ہیں اور انہیں بڑی پریشانی کا سامنا کرنا پڑا ہے۔

مقامی افراد اور گاڑی چلانے والوں کا الزام ہے کہ پیٹرول اسٹیشن پر صرف پاور پیٹرول فراہم کیا جا رہا ہے، حالانکہ وہاں عام پیٹرول بھی دستیاب ہونا چاہیے تھا۔ انہوں نے اس دھوکہ دہی کے خلاف سخت کارروائی کا مطالبہ کیا ہے تاکہ دیگر صارفین کو بھی اس قسم کی مشکلات کا سامنا نہ کرنا پڑے۔