چوری کا ایسا حربہ آپ نے کبھی نہیں دیکھا ہوگا! خاتون ڈاکٹر بن کر مریض کے سونے کے زیورات لے اڑی
ایک پولیس عہدیدار کے مطابق خاتون ڈاکٹر کا کوٹ پہن کر اسپتال میں داخل ہوئی اور بغیر کسی جانچ کے اندر گھومتی رہی۔ پولیس سی سی ٹی وی فوٹیج کا جائزہ لے رہی ہے اور جلد ہی ملزمہ کی شناخت کرنے کی کوشش کی جارہی ہے۔
حیدرآباد: شہر کے ایک بڑے ملٹی اسپیشلٹی اسپتال میں چوری کا ایک حیران کن واقعہ پیش آیا، جہاں ایک خاتون ڈاکٹر بن کر اسپتال میں داخل ہوئی اور مریض کے سونے کے زیورات چراکر فرار ہوگئی۔ اس واقعہ کا انکشاف اسپتال کے سی سی ٹی وی فوٹیج سے ہوا ہے جس کی بنیاد پر پولیس ملزمہ کی تلاش میں مصروف ہے۔
اطلاعات کے مطابق خاتون سفید ڈاکٹر کوٹ پہن کر اسپتال پہنچی تھی۔ دروازے پر موجود سکیورٹی عملہ اسے ڈاکٹر سمجھ کر بغیر کسی جانچ کے اندر جانے دیا۔ اسپتال میں نصب سی سی ٹی وی کیمروں میں وہ مختلف راہداریوں میں گھومتی ہوئی نظر آئی، مگر کسی نے اس سے پوچھ گچھ نہیں کی کیونکہ سب نے اسے اسپتال کی ڈاکٹر سمجھا۔
تحقیقات کے مطابق خاتون پہلے نرسنگ روم گئی جہاں سے اس نے چند انجکشن اور طبی سامان اٹھا لیا تاکہ اس کا لباس زیادہ حقیقی لگے۔ اس کے بعد وہ ایک مریض کے کمرے میں پہنچی اور وہاں سے مریض کے سونے کے زیورات چرا لئے۔ اس دوران اسپتال کے عملہ کو اس پر کسی قسم کا شک نہیں ہوا۔
چوری کے بعد خاتون خاموشی سے اسپتال سے باہر نکل گئی۔ بعد میں جب واقعہ کا علم ہوا تو اسپتال انتظامیہ نے پولیس کو اطلاع دی۔
ایک پولیس عہدیدار کے مطابق خاتون ڈاکٹر کا کوٹ پہن کر اسپتال میں داخل ہوئی اور بغیر کسی جانچ کے اندر گھومتی رہی۔ پولیس سی سی ٹی وی فوٹیج کا جائزہ لے رہی ہے اور جلد ہی ملزمہ کی شناخت کرنے کی کوشش کی جارہی ہے۔
فی الحال پولیس ملزمہ کی تلاش میں مصروف ہے اور حکام کا کہنا ہے کہ شناخت ہوتے ہی اس کے خلاف سخت کارروائی کی جائے گی۔
