وزیراعظم کو قابل اعتراض ای میل بھیجنے والا گرفتار

بدایوں: اترپردیش کے ضلع بدایوں کے تھانہ سیول لائن علاقہ کے ایک شخص کو کل دیر رات گجرات انسداد بدعنوانی دستہ (اے ٹی ایس) نے گرفتار کرلیا اور اس کو اپنے ساتھ لے کر گجرات چلی گئی۔

گرفتار ملزم پر الزام ہے کہ اس نے وزیر اعظم کے تعلق سے قابل اعتراض ای میل کیا ہے۔ملزم امن سکسینہ کے والد کا کہنا ہے کہ اس کے لڑکے نے آئی آئی ٹی سے پڑھائی کی ہے اور اس کا ذہنی توازن بگڑا ہوا ہے۔

ملزم کے والد نے بتایا کہ وزیر اعظم کے دفتر کو ای میل بھیجنے میں دہلی کی ایک لڑکی تانیہ بھی شامل ہے جو امن کی دوست ہے اور امن کا موبائل تانیہ نام کی لڑکی کے پاس ہی ہے۔

انہوں نے بتایا کہ امن نے آئی آئی ٹی ممبئی سے انجینئرنگ کی ڈگری لی تھی اس کے بعد کچھ دن اس کا ذہنی توازن بگڑنے پر اس نے نوکری چھوڑ دی تھی۔انہوں نے بتایا کہ امن ان کا اکلوتا بیٹا ہے۔ کنبہ نے اسے خراب چال و چلن کی وجہ اخبار میں اشتہار دے کر اسے بے دخل کردیا تھا۔ ملزم امن پہلے بھی لیاپ ٹاپ چوری کے معاملہ میں پکڑا جاچکا ہے۔

اس وقت طالب علم ہونے کی وجہ سے پولیس نے لیاپ ٹاپ برآمد کرکے اسے چھوڑ دیا تھا۔ اس کے بعد بھی اس کی سرگرمیاں لگاتار مشتبہ رہیں۔بدایوں کے سینئر سپرنٹنڈنٹ آف پولیس او پی سنگھ نے بتایا کہ گجرات سے اے ٹی ایس کی ٹیم آئی تھی اور تھانہ سیول لائنس کے محلہ آدرش نگر کے رہنے والے امن کو پوچھ تاچھ کے لئے اسے اپنے ساتھ لے کر گجرات گئی ہے۔

انہوں نے بتایا کہ کل دیر رات اے ٹی ایس گجرات سے کچھ لوگ آئے تھے اور ان کو بتایا کہ ایک مشتبہ سرگرمی کے معاملہ میں سیول لائن تھانہ علاقہ کے امن سکسینہ سے پوچھ تاچھ کرنا ہے۔ بدایوں پولیس نے لڑکے تک پہنچنے میں ان کی مدد کی اور اے ٹی ایس ٹیم امن کو پوچھ تاچھ کے لئے اپنے ساتھ گجرات لے گئی ہے۔