پیغمبر اسلام کے خلاف ریمارکس پر ہم نے کچھ نہیں کہا: وزیر خارجہ بنگلہ دیش

ڈھاکہ: بنگلہ دیش کے وزیر خارجہ عبدالمومن نے کہا کہ ہندوستان میں حکمراں بھارتیہ جنتا پارٹی (بی جے پی) کی ترجمان نپور شرما کی جانب سے پیغمبر اسلام کی شان میں توہین آمیز تبصرے کے بعد بھی ہم نے اس کے خلاف احتجاج کرنے والوں کا ساتھ نہیں دیا۔

مومن نے چٹاگانگ میں جنٹم اشٹمی کی ایک تقریب میں تقریر کے دوران کہا کہ "میں نے وزیراعظم شیخ حسینہ سے کہا کہ جب میں ہندوستان جاؤں گا تو آپ کو اپنے اس موقف پر قائم رہنا چاہیے۔”

انہوں نے کہا کہ بنگلہ دیش اور ہندوستان دونوں کو سیاسی استحکام کی ضرورت ہے اور یہ اسی صورت میں ممکن ہے جب ہندوستان شیخ حسینہ کی حکومت کی حمایت کرے۔

مسٹر مومن نے مزید کہا کہ ’’بہت سے لوگ مجھے ہندوستان کا دلال کہتے ہیں کیونکہ جب بھی ایسا کچھ ہوتا ہے، میں کوئی مضبوط پیغام نہیں دیتا۔‘‘

وزیر خارجہ بنگلہ دیش نے کہا کہ ’’بی جے پی ترجمان کو قابل اعتراض ریمارکس کرنے کے بعد معطل کر دیا گیا تھا۔ خاتون ترجمان نے کچھ عرصہ قبل پیغمبر اسلام کے بارے میں قابل اعتراض تبصرہ کیا تھا لیکن ہم نے اس پر ایک لفظ بھی نہیں کہا جبکہ مختلف ممالک نے ان ریمارکس کی شدید مخالفت کی تھی۔ ہم آپ کو اس قسم کا تحفظ دے رہے ہیں۔ یہ آپ کے اور ہماری بھلائی کے لیے ہے۔‘‘