لوک عدالت میں 11لاکھ مقدمات کی یکسوئی

حیدرآباد (منصف نیوز بیورو) نیشنل لیگل سرویس اتھارٹی (نالسا) کے حکم پر ریاست بھر میں منعقد کی گئی قومی لوک عدالت میں 11 لاکھ سے زیادہ مقدمات کا فیصلہ کیا گیا۔ متاثرین کو 595 کروڑ روپے کا معاوضہ دیا گیا۔

تلنگانہ اسٹیٹ لیگل سرویس اتھارٹی کے رکن سکریٹری، سی ایچ پنچاکشری نے یہ معلومات فراہم کیں۔ اسٹیٹ لیگل سرویس اتھارٹی کے ایگزیکٹو چیئرمین اور ہائی کورٹ کے سینئر جج جسٹس پی شیام کوشی نے لوک عدالت کے کام کی ذاتی طور پر نگرانی کی۔

انہوں نے نرمل ضلع میں لوک عدالت کا افتتاح کیا اور فریقین کو مقدمات سے متعلق چیک تقسیم کیے۔ اسی طرح، ہائی کورٹ کے احاطہ میں ہائی کورٹ لیگل سرویس کمیٹی کی چیئرپرسن جسٹس موشمی بھٹاچاریہ کی نگرانی میں لوک عدالت منعقد ہوئی۔

اس میں، 2016 میں ایک سڑک حادثہ میں معذور ہونے والے ایک طالب علم کو نیو انڈیا انشورنس کمپنی نے 1.20 کروڑ روپے کا معاوضہ دے کر مقدمہ نمٹا دیا۔ جسٹس موشمی بھٹاچاریہ نے متاثرہ شخص کو یہ چیک دیا۔