متحدہ عرب امارات میں ایک لاکھ ملازمتوں کے مواقع

ابو ظہبی: متحدہ عرب امارات میں اگلے 4 برسوں میں ایک لاکھ ملازمتیں پیدا ہوں گی جس کی وجہ مائیکرو سافٹ کمپنی کی ریاست میں بڑے پیمانے پر کاروباری سرگرمیاں ہیں۔

انٹرنیشنل ڈیٹا کارپوریشن کی حال ہی میں جانے والی ایک اسٹڈی کے مطابق مائیکرو سافٹ کلاؤڈ اگلے 4 برسوں میں عرب امارات میں 39 بلین امریکی ڈالر کا منافع کمائے گی۔

مائیکرو سافٹ، اس کے شراکت داروں اور صارفین کی جانب سے بڑے پیمانے پر کاروباری سرگرمیوں کے باعث امارات میں لگ بھگ 97 ہزار ملازمتوں کا اضافہ ہوگا۔ ان میں سے 29 ہزار ملازمتیں انفارمیشن ٹیکنالوجی (آئی ٹی) کے شعبے میں ہوں گی۔

اسٹڈی میں کہا گیا ہے کہ سنہ 2026 تک مائیکرو سافٹ کلاؤڈ مقامی معیشت میں اپنی خدمات اور پروڈکٹس کی مد میں 3.4 بلین ڈالر شامل کرے گا، جواب میں اسے 39 بلین ڈالر کا ریونیو حاصل ہوگا۔

مائیکرو سافٹ عرب امارات کے جنرل مینیجر نعیم یزبک کا کہنا ہے کہ یہ تحقیق اس بات کی تصدیق ہے کہ مائیکرو سافٹ کی کوششیں حکومت، بزنس کمیونٹی اور شہریوں کو سپورٹ کرتی ہیں اور یہی وجہ ہے کہ تمام فریقین اس کے فوائد حاصل کر رہے ہیں۔