لبنان پر اسرائیلی فضائی حملوں میں 2,792 افراد فوت: وزارت صحت

بیروت: 8 اکتوبر 2023 کو اسرائیل-حزب اللہ تنازعہ کے آغاز کے بعد سے لبنان پر اسرائیلی فضائی حملوں میں مرنے والوں کی تعداد 2,792 ہوگئی ہے، جب کہ زخمیوں کی تعداد 12,772 تک پہنچ گئی۔ لبنان کی وزارت صحت نے منگل کے روز یہ اطلاع دی۔

وزارت صحت نے مزید کہا کہ گذشتہ پیر کے روز، 82 افراد فوت اور 180 دیگر زخمی ہوئے۔

مزید برآں، لبنانی فوجی ذرائع نے بتایا کہ اسرائیلی فوج نے منگل کے روز جنوبی لبنان کے تقریباً 30 دیہاتوں، قصبوں اور شہروں پر 50 سے زیادہ فضائی حملے کیے ہیں۔

ذرائع نے مزید کہا کہ سب سے شدید حملہ جنوبی شہر سیدون کے صیدا محلے میں ہوا، جہاں تین عمارتوں کو نشانہ بنایا گیا، جس کے نتیجے میں چھ افراد فوت اور 37 زخمی ہوئے، جن میں سے اکثریت بے گھر افراد کی تھی۔

ذرائع نے بتایا کہ اسرائیلی جنگی طیاروں نے لبنان اور شام کو ملانے والی سرحدی سڑک پر فضا سے زمین پر مار کرنے والے چھ میزائلوں کے ذریعہ تین فضائی حملے بھی کیے، جس سے دونوں ممالک کے درمیان دونوں سمتوں سے سفر کرنے والے راہگیروں کی نقل وحرکت میں رکاوٹ پیدا ہوئی۔

دریں اثناء، ذرائع کے مطابق، حزب اللہ کے دستے اور لبنان کے جنوب مشرقی گاؤں خیام میں دراندازی کرنے والی اسرائیلی فورسز کے درمیان جھڑپیں جاری ہیں۔

انہوں نے کہا کہ "جھڑپوں میں بھاری مشین گن، توپ خانے کے گولے اور راکٹ استعمال کیے جا رہے ہیں، جبکہ اسرائیلی جنگی طیارے گاؤں کے مرکز پر شدید حملے کر رہے ہیں”۔

حزب اللہ نے منگل کے روز الگ الگ بیانات میں کہا کہ اس کے جنگجوؤں نے "اسرائیلی ہیڈ کوارٹرز اور مقامات پر میزائلوں اور ڈرونز سے حملہ کیا، جن میں سنیر، اور زاریت کے ساتھ شمالی اسرائیلی قصبہ مالوت بھی شامل ہے۔”

اس میں مزید کہا گیا کہ ایک اسرائیلی ہرمیس 900 ڈرون کو جنوب مشرقی لبنانی قصبے کی فضائی حدود میں مار گرایا گیا۔