Burqa Woman : بغیر ٹکٹ سفر کرنے والی برقع پوش خاتون نے ٹرین میں مچایا ہنگامہ (ویڈیو وائرل)

دہلی: ایک برقع پوش خاتون نے ٹرین کے اے سی کوچ میں شدید ہنگامہ آرائی کی، جس کی ویڈیو سوشل میڈیا پر تیزی سے وائرل ہو رہی ہے۔ یہ واقعہ اُس وقت پیش آیا جب خاتون بغیر ٹکٹ اے سی کوچ میں داخل ہوئی اور ایک دوسرے مسافر کی محفوظ شدہ نشست (ریزرو سیٹ) پر زبردستی بیٹھ گئی۔ جب ٹی ٹی ای (ٹکٹ چیکر) اور مسافروں نے اسے نشست خالی کرنے اور ٹکٹ دکھانے کو کہا، تو خاتون نے نہ صرف انکار کیا بلکہ بدتمیزی اور گالی گلوچ پر اُتر آئی۔

"جا کر وزیراعظم سے پوچھو” – خاتون کی دھمکیاں

وائرل ویڈیو میں صاف دکھائی دیتا ہے کہ خاتون کسی کی سننے کو تیار نہیں۔ جب ریلوے پولیس (RPF) اور دیگر عملہ نے شائستگی سے ٹکٹ مانگا، تو خاتون مزید برہم ہو گئی۔ مسافروں سے دھکم پیل کرتے ہوئے ایک موقع پر وہ ایک مسافر کو دھمکاتے ہوئے کہتی ہے: "کاٹ کر ٹکڑے ٹکڑے کر دوں گی، زیادہ بکواس مت کر!”، "جا، وزیراعظم سے جا کر پوچھ کہ میرا ٹکٹ ہے یا نہیں!”

خاتون بار بار عملے کی بات کو نظر انداز کرتی ہے اور ایک موقع پر منہ پھیر کر بیٹھ جاتی ہے، جیسے کہ وہ کسی سوال یا کارروائی کا جواب دینے کی پابند نہیں۔

صورتحال اس قدر کشیدہ ہو گئی کہ کوچ میں موجود مسافر خوفزدہ ہو کر اپنی نشستیں چھوڑ کر دور جا بیٹھے۔ ویڈیو میں خاتون کو مسلسل بازاری زبان اور گھٹیا گالیاں دیتے ہوئے سنا جا سکتا ہے۔ اس دوران RPF اہلکار بار بار اسے تحمل اور قانون کا پاس رکھنے کی تلقین کرتے رہے۔

چونکہ ٹرین میں اس وقت کوئی خاتون اسٹاف موجود نہیں تھا، اس لیے اے ایس آئی نے اگلے اسٹیشن پر خاتون اسٹاف کی فراہمی کے لیے کنٹرول روم کو اطلاع دی۔ جب ٹرین اسٹیشن پر پہنچی، تو وہاں خاتون کانسٹیبل اور ڈیوٹی پر موجود ٹی سی موقع پر پہنچیں۔

انہوں نے خاتون سے بات چیت کی اور بڑی مشکل سے اسے سمجھا بجھا کر کوچ سے اتارا گیا۔ ریلوے حکام نے وضاحت دی کہ چونکہ رات کا وقت تھا اور خاتون تنہا سفر کر رہی تھی، اس لیے اسے حراست میں نہیں لیا گیا، تاہم مستقبل کے لیے اس واقعہ کا ریکارڈ محفوظ رکھا گیا ہے۔