حیدرآباد کے ایک گودام میں زبردست آگ لگ گئی

حیدرآباد: حیدرآباد کے کشائی گوڑہ میں واقع ایک گودام میں اتوار کی رات زبردست آگ لگ گئی۔ رات تقریباً ساڑھے نو بجے اچانک گودام میں آگ بھڑک اٹھی اور دیکھتے ہی دیکھتے شعلے بلند ہوگئے۔

کثیف دھوئیں نے اطراف کے علاقہ کو اپنی لپیٹ میں لے لیا جس کے باعث قریبی گھروں میں مقیم افراد خوف و ہراس کا شکار ہوگئے اور کئی لوگ اپنے مکانوں سے باہر نکل آئے۔

اطلاع ملتے ہی پولیس اور فائر بریگیڈ کے عملے نے فوری طور پر موقع پر پہنچ کر تین فائر انجنوں کی مدد سے کئی گھنٹوں کی جدوجہد کے بعد آگ پر قابو پایا۔ ابتدائی تحقیقات میں شبہ ظاہر کیا جارہا ہے کہ یہ آگ شارٹ سرکٹ کے باعث لگی ہے۔

گودام میں جمع پلاسٹک، کاغذ اور لوہے کے سامان کے سبب آگ تیزی سے پھیل گئی جس سے لاکھوں روپے مالیت کا نقصان ہوا ہے۔

پولیس نے بتایا کہ خوش قسمتی سے کوئی جانی نقصان نہیں ہواالبتہ بڑے پیمانہ پر مالی نقصان ضرور ہوا ہے۔ گودام کے مالک اور ذمہ داروں سے تفصیلی پوچھ گچھ کی جارہی ہے اور اس سلسلہ میں مقدمہ درج کرلیا گیا ہے۔ واقعہ کے بعد علاقہ میں پولیس نے حفاظتی اقدامات مزید سخت کردیے ہیں۔