ایرپورٹ کیلئے فضائیہ کی منظوری، تلنگانہ کے عادل آباد میں مسرت کی لہر

حیدرآباد: برسوں کے انتظار کے بعد ایرپورٹ کے قیام کے لئے ہندوستانی فضائیہ کی اصولی منظوری ملنے پر تلنگانہ کے ضلع عادل آباد کے مقامی افرادخوشی کا اظہار کر رہے ہیں۔عادل آباد ٹاون کے قریب وزارت دفاع کی 362 ایکڑ اراضی دستیاب ہے۔

یہاں ایک ایرپورٹ بنانے کے لئے عوام اور عوامی نمائندے کئی سالوں سے حکومت سے مطالبہ کر رہے تھے۔مرکزی اور ریاستی حکومتوں نے ایرپورٹ کے قیام لئے مثبت رویہ اختیار کرتے ہوئے وزارت دفاع سے مشاورت کی، جس کے نتیجہ میں اس کی اجازت دے دی گئی۔ یہاں فضائیہ کا تربیتی مرکز قائم کرنے کے امکانات کا جائزہ لیا جائے گا۔

اس اقدام سے نہ صرف علاقہ میں سفری سہولیات میں بہتری آئے گی بلکہ قومی دفاع میں ضلع کو ایک منفرد شناخت بھی حاصل ہوگی۔

علاقہ کے عوامی نمائندوں نے اس پیش رفت کا خیرمقدم کرتے ہوئے کہا کہ ایرپورٹ کے قیام سے نہ صرف کاروباری اور تجارتی سرگرمیوں کو فروغ ملے گا بلکہ سیاحت میں بھی اضافہ ہوگا۔

مقامی صنعتوں، تعلیمی اداروں، اور طبی سہولیات کے لئے بھی یہ ایک اہم پیش رفت ثابت ہو سکتی ہے۔عوام کا مطالبہ ہے کہ حکومت جلد از جلد اس منصوبہ پر عمل درآمد کرے اور بنیادی ڈھانچے کی تعمیر کے لیے مناسب فنڈز فراہم کرے۔

ماہرین کا کہنا ہے کہ ایرپورٹ کے قیام سے عادل آباد کو بڑے شہروں سے جوڑنے میں مدد ملے گی، جس سے ترقی کے نئے دروازے کھلیں گے۔