دہلی میں ہوا کا معیار انتہائی خراب ، درجہ حرارت 5 ڈگری سینٹی گریڈ پہنچا

نئی دہلی: قومی دارالحکومت کے باشندوں نے جمعہ کو ایک اور سرد صبح کا سامنا کیا جب درجہ حرارت 5 ڈگری سینٹی گریڈ تک پہنچ گیا جس سے سردی میں مزید اضافہ ہوا۔ یہ اطلاع ہندوستان کے محکمہ موسمیات (آئی ایم ڈی) نے دی۔

دریں اثنا ہوا کا معیار بہت خراب رہا۔ شہر کے کئی حصے اسموگ کی موٹی چادر سے ڈھکے رہے۔ جبکہ دہلی اور نیشنل کیپٹل ریجن (این سی آر) کے کئی حصوں میں ہلکی بوندا باندی کی اطلاع ملی ۔

صبح ساڑھے چھ بجے سے صبح 8 بجے کے درمیان الگ الگ مقامات پر بارشیں ہوئی جن نے نوئیڈا ، غازی آباد ، دادرا اور قریبی علاقوں سمیت کئی علاقوں کو نم کردیا ، جس سے سردی بڑھ گئی اور صبح کے اوقات میں سردی میں مزید اضافہ ہوگا۔

ہندوستان کے محکمہ موسمیات (آئی ایم ڈی) کے مطابق دہلی میں شدید سردی کی لہر کی لپیٹ میں رہنے کی توقع ہے ، جس میں کم سے کم درجہ حرارت 5 ڈگری سینٹی گریڈ اور دن کا زیادہ سے زیادہ درجہ حرارت 16 ڈگری سینٹی گریڈ اور 17 ڈگری سینٹی گریڈ کے درمیان رہنے کا امکان ہے ۔

صفدرجنگ میں جمعرات کو درجہ حرارت میں نمایاں کمی دیکھی گئی ، جس میں کم از کم 5.8 ڈگری سینٹی گریڈ ریکارڈ کیا گیا ، جبکہ لودھی روڈ پر پارہ 6.1 ڈگری سینٹی گریڈ تک گر گیا ۔