ویڈیوز: بفرزون میں خوف کے سائے میں مقیم افراد کو اکبراویسی کی یقین دہانی

حیدرآباد : (آئی اے این ایس) اسمبلی میں مجلس اتحادالمسلمین کے فلور لیڈراکبرالدین اویسی نے موسیٰ ندی کے کنارے مقیم افراد کو یقین دہانی کرائی کہ انہیں یہاں سے بے دخل نہیں کیاجائے گا۔

موسیٰ ندی کناروں اور بفرزون میں خوف کے سائے میں مقیم افراد کو خدشہ ہے کہ موسیٰ ریور فرنٹ ڈیولپمنٹ پروجیکٹ کیلئے ان کے مکانات کومنہدم کیاجائے گا۔

اکبرالدین اویسی نے حلقہ اسمبلی بہادرپورہ کے چندعلاقوں کا دورہ کیا۔ اکبراویسی نے جن کے ساتھ مجلس رکن اسمبلی محمدمبین بھی موجود تھے‘ عوام سے راست تبادلہ خیال کیا۔

مجلس کے فلور لیڈر نے ان افراد کی ڈھارس باندھتے ہوئے انہیں یقین دلایا کہ اگر حالت ایسے بنتے ہیں کہ آپ کی املاک کا کچھ حصہ انہدامی کاروائی کی نذرہوگا تو اس حصہ کا آپ کو معقول معاوضہ دلایاجائے گا۔

ہم آپ سے بھاری معاوضہ دلانے کا وعدہ کرتے ہیں۔ انہوں نے بھاری معاوضہ دلانے کا بھی تیقن دیا۔ ہماری اولین ترجیح یہی رہے گی آپ اپنے مکانات سے محروم نہ ہوں‘ اگر آپ اپنی جائیداد سے محروم ہوتے ہیں تو آپ کو ایک روپئے کا معاوضہ 100 روپئے دلائیں گے۔ ’یہ میرا وعدہ ہے‘

اکبراویسی نے کہا کہ یہاں مقیم افراد کو کے سی آر کے دور میں تعمیرکردہ ڈبل بیڈروم امکنہ میں منتقل کرنے کا سوال ہی پیدا نہیں ہوتا۔