عوام تک پہنچنے روزانہ 4 تا 5 اسمبلی حلقوں میں روڈ شو‘ کشن ریڈی کا اعلان

حیدرآباد: صدر بی جے پی تلنگانہ کمیٹی ومرکزی وزیر جی کشن ریڈی نے کہا کہ تلنگانہ اسمبلی انتخابات میں عوام تک پہونچنے کے لئے روڈ شو کا انعقاد کیا جائے گا۔

اس روڈ شو میں صدر بی جے پی نیشنل کمیٹی جے پی نڈا‘ مرکزی وزراء امیت شاہ‘راج ناتھ سنگھ اور دیگر شرکت کریں گے۔ وزیراعظم نریندر مودی انتخابی مہم کے آخری مراحل میں 2 تا 3 جلسے عام کا انعقاد کریں گے۔

جی کشن ریڈی آج بی جے پی آفس واقع ہوٹل کاتریہ میں پارٹی کے امیدواروں میں بی فارم تقسیم کئے۔ انہوں نے کہا کہ بی جے پی کا روڈ شو روزانہ 4 تا 5 اسمبلی حلقوں میں کیا جائے گا۔

انہوں نے کہا کہ بعض اداروں کی جانب سے اسمبلی انتخابات میں بی جے پی کو انتہائی کم نشستیں حاصل ہونے سے متعلق غلط پروپگنڈہ کیا جارہا ہے۔

انہوں نے کہا کہ ریاست میں بی سی طبقے کی 55 فیصد آبادی ہے‘ اب تک کسی بھی سیاسی جماعت نے بی سی طبقے کے قائد کو چیف منسٹر کے عہدے پر فائز نہیں کیا ہے۔ بی جے پی نے بی سی طبقے کے قائد کو ریاست کا چیف منسٹر بنانے کا فیصلہ کیا ہے۔