اے پی:11سالہ لڑکی کو 50سالہ شخص کا دل لگایاگیا

حیدرآباد: آندھراپردیش میں ایک 11سالہ لڑکی کو 50سالہ شخص کا دل لگایاگیا۔تروپتی میں سری پدماوتی چلڈرن ہارٹ اسپتال کے ڈاکٹروں نے گذشتہ روز دل کی کامیاب پیوند کاری کرتے ہوئے یہ کارنامہ انجام دیا۔

حیدرآباد کے ونستھلی پورم کی ایک 11 سالہ لڑکی کو دل کی پیوند کاری کی ضرورت تھی۔ ڈاکٹروں نے اس کیس کو اے پی کے تروپتی ریفر کیا۔

6 نومبر کو تروپتی کے ڈاکٹروں کی ٹیم نے لڑکی کے طبی معائنے کئے جس کے بعد جیون دان ٹرسٹ میں نام درج کروایا۔ بعدازاں پتہ چلا کہ آندھراپردیش کے سریکاکولم ضلع کا ایک 50 سالہ شخص فالج کی وجہ سے ذہنی طورپر مردہ قراردیاگیا تھا۔

اس کے ارکان خاندان اس کے اعضاء کے عطیہ کے لیے آگے آئے۔ دل کا عطیہ سریکاکولم کے ایک اسپتال کو دیاگیا اور وہاں سے ایک ہیلی کاپٹر میں ویزاگ اور پھر وہاں سے تروپتی لایا گیا جس میں تقریباً تین گھنٹے لگے۔

اسے رینی گنٹہ ایرپورٹ سے گرین چینل کے ذریعہ لایا گیا تھا۔اسپتال کے ڈائریکٹر ڈاکٹر شری ناتھ ریڈی اور ڈاکٹر گنپتی کی رہنمائی میں آپریشن تھیٹر پہلے سے ہی تیار تھا جہاں اس لڑکی کے دل کی پیوند کاری کی سرجری کامیابی کے ساتھ انجام دی گئی۔