اے پی: وائی ایس آرکانگریس کے رکن اسمبلی کا رائے دہندہ پر حملہ, رائے دہندہ نے بھی طمانچہ رسید کردیا: ویڈیو

حیدرآباد: وائی ایس آرکانگریس کے رکن اسمبلی سیواکمارنے انہیں قطار میں ٹہرکر ووٹ کے استعمال کیلئے رائے دہندہ کی خواہش پر اپنے حامیوں کے ساتھ مل کر رائے دہندہ پر حملہ کردیا۔

اس واقعہ کاویڈیو سوشیل میڈیا کے اہم پلیٹ فارمس پر تیزی کے ساتھ وائرل ہوگیا۔ذرائع کے مطابق ضلع گنٹور کے تنالی میں رکن اسمبلی و امیدوار سیواکمار ایک پولنگ بوتھ پر ووٹ ڈالنے کیلئے پہنچے۔

اس موقع پر ایک رائے دہندہ جو وہاں ووٹ کے استعمال کے لئے اپنی باری کا انتظارکررہاتھا نے رکن اسمبلی سے خواہش کی کہ وہ بھی قطار میں ٹہریں جس پر رکن اسمبلی اس شخص پر برہم ہوگئے اور اس پر حملہ کردیا۔

جواب میں اس شخص نے بھی رکن اسمبلی کو طمانچہ رسید کردیا۔اس کے ساتھ ہی رکن اسمبلی کے حامیوں کی بڑی تعداد نے پولنگ بوتھ میں ہی رائے دہندہ پر حملہ کردیا۔واضح رہے کہ اے پی میں لوک سبھا اور اسمبلی کے انتخابات ایک ساتھ ہورہے ہیں۔