ایشیا کپ فائنل کے ہیرو تلک ورما کاحیدرآباد کے شمس آباد ایرپورٹ پرشانداراستقبال

حیدرآباد: ایشیا کپ فائنل کے ہیرواورابھرتے ہوئے جواں سال حیدرآبادی کرکٹر تلک ورما، جنہوں نے اپنی شاندار بلے بازی سے ٹیم انڈیا کی کامیابی میں کلیدی کردار ادا کیا، کاتلنگانہ حکومت کی جانب سے شاندار استقبال کیا گیا۔

وزیراعلی ریونت ریڈی کی ہدایت پر تلنگانہ اسپورٹس اتھارٹی کے چیئرمین شیو سینا ریڈی اور ایم ڈی سونی بالادیوی نے شمس آباد ایئرپورٹ پر تلنگانہ اسپورٹس ڈپارٹمنٹ کی جانب سے ورما کا استقبا ل کیا۔

اس موقع پر شیو سینا ریڈی نے 22سالہ نمبوری ٹھاکر تلک ورما کو پاکستان کے خلاف ایشیا کپ کے فائنل میں شاندار کارکردگی پر مبارکباد دی۔ انہوں نے کہا کہ مشکل حالات میں تلک کی میچ جیتنے والی کارکردگی نوجوان کھلاڑیوں کے لئے تحریک کا باعث ہوگی۔

انہوں نے بتایا کہ وزیراعلی ریونت ریڈی نے تلک ورما کو خصوصی مبارکباد بھی دی ہے۔واضح رہے کہ ایشیا کپ فائنل میں ورما کی شاندار اننگز کے بدولت ہندوستان کو کامیابی ملی جو 53گیندوں میں 69رنزاسکور کرتے ہوئے ناٹ آوٹ رہے جس میں چارچھکے اورتین چوکے شامل ہیں۔اس شاندار مظاہرہ پران کوفائنل کا مین آف دی میچ کا ایوارڈ دیاگیا۔