شمس آباد ایرپورٹ پر بحرین سے آنے والی فلائٹ میں بم کی اطلاع سے سنسنی

حیدرآباد: شہرحیدرآباد کے شمس آبادایرپورٹ پر بحرین سے آنے والی ایک انٹرنیشنل فلائٹ میں بم کی اطلاع سے سنسنی پھیل گئی۔

تفصیلات کے مطابق، بحرین سے شمس آباد پہنچنے والی گلف ایئر لائنس (فلائٹ نمبر 274) کو ای میل کے ذریعہ بم سے اڑانے کی دھمکی دی گئی تھی۔

پائلٹ نے مہارت سے طیارہ کو ایرپورٹ پر محفوظ طریقہ سے لینڈ کیا جس کے بعد سیکیورٹی حکام نے فوری کارروائی کرتے ہوئے تمام مسافروں کو بحفاظت نیچے اتارا اور طیارہ کو معائنہ کے لیے مخصوص آئیسولیشن ایریا میں منتقل کر دیا۔

بم ڈسپوزل اسکواڈ اور سیکوریٹی فورسس کی جانب سے طیارہ کی مکمل تلاشی لی گئی جس کے بعد حکام نے تصدیق کی کہ طیارہ میں کوئی مشکوک شے نہیں ملی اور یہ دھمکی محض ایک افواہ ثابت ہوئی۔

ایرپورٹ پولیس نے فرضی بم کی دھمکی والے ای میل کے خلاف مقدمہ درج کر لیا ہے اور اس واقعہ میں ملوث افراد کی تلاش کے لیے تحقیقات شروع کر دی۔