نیوز چینل پر حملہ کے معاملہ میں بی آر ایس رہنما جی سرینواس یادو گرفتار، تلنگانہ بھون میں کشیدگی

حیدرآباد: حیدرآباد کی جوبلی ہلز پولیس نے ہفتہ کی رات بی آر ایس کے رہنما جی سرینواس یادو کو ایک نیوز چینل کے دفتر پر حملہ کے سلسلہ میں گرفتار کر لیا۔

ہفتہ کی دوپہر چند افراد نے اس نیوز چینل پر سابق وزیر اعلیٰ و بی آر ایس صدر کے چندر شیکھر راؤ اور کے ٹی راما راؤ کے خلاف مبینہ توہین آمیز رپورٹس نشر ہونے کے بعد چینل کے دفتر پر حملہ کیا اور وہاں کچھ املاک کو نقصان پہنچایا۔ اس واقعہ کے بعد جوبلی ہلز پولیس اسٹیشن میں حملہ آوروں کے خلاف مقدمہ درج کیا گیا۔

کل شب پولیس کو اطلاع ملی کہ جی سرینواس یادو تلنگانہ بھون میں موجود ہیں۔ فوراً وہاں پہنچ کر پولیس نے انہیں حراست میں لے لیا۔

بی آر ایس کارکنوں نے جی سرینواس یادو کی گرفتاری کی شدید مذمت کرتے ہوئے تلنگانہ بھون کے سامنے احتجاج کیا، جس کے نتیجہ میں علاقہ میں کشیدگی پیدا ہو گئی۔