بی آرایس کے رکن اسمبلی ریڈیانائیک کو تلخ تجربہ کا سامنا

حیدرآباد: تلنگانہ کے محبوب آباد ضلع میں حکمران جماعت بی آرایس کے رکن اسمبلی ریڈیانائیک کو تلخ تجربہ کا سامنا کرناپڑا۔ترقیاتی کاموں کے افتتاح کے سلسلہ میں ضلع کے دتا پلی اور ماری پیڈا منڈلوں کو جانے والے رکن اسمبلی کو مقامی خواتین نے ولو منڈل میں روک دیا۔

مقامی خواتین نے الزام لگایا کہ ایس سی اور ایس ٹی کو دیئے گئے مکانات پر قبضہ کیاجارہا ہے۔ان خواتین نے برہمی کا اظہار کرتے ہوئے کہاکہ گزشتہ دس سال سے وہ ان کو ووٹ دے رہی ہیں تاہم قبل ازیں کی حکومت کی جانب سے دی گئی اراضیات پر غیرمجاز قبضے کرنا کہاں تک درست ہے؟۔

انہوں نے افسوس کااظہارکرتے ہوئے کہاکہ بعض افراد ڈبل بیڈ روم والے مکان کے لیے رقم مانگ رہے ہیں۔ اس پر رکن اسمبلی نے کہا کہ وہ ووٹ مانگنے نہیں آئے بلکہ مسائل حل کرنے آئے ہیں۔ انہوں نے کہا کہ ذاتی اراضی رکھنے والوں کو مکانات بنانے کیلئے حکومت تین لاکھ روپئے دینے کی تجویز رکھتی ہے۔