کیبن عملہ کارکن اچانک علیل۔سعودی ایئر لائنس کے طیارہ کی حیدرآباد کے شمس آباد ایرپورٹ پرایمرجنسی لینڈنگ
حیدرآباد کے شمس آباد ایرپورٹ پرآج صبح طیارہ نے ایمرجنسی لینڈنگ کی۔ تفصیلات کے مطابق سعودی ایئر لائنس کا طیارہ (SV-845) بنکاک سے جدہ جا رہاتھا کہ طبی ایمرجنسی کے باعث پائلٹس نے طیارہ کا رخ شمس آبادایرپورٹ کی طرف موڑ دیا۔
حیدرآباد: حیدرآباد کے شمس آباد ایرپورٹ پرآج صبح طیارہ نے ایمرجنسی لینڈنگ کی۔ تفصیلات کے مطابق سعودی ایئر لائنس کا طیارہ (SV-845) بنکاک سے جدہ جا رہاتھا کہ طبی ایمرجنسی کے باعث پائلٹس نے طیارہ کا رخ شمس آبادایرپورٹ کی طرف موڑ دیا۔
اطلاعات کے مطابق، دوران پرواز کیبن عملہ کا ایک رکن اچانک شدید علیل ہو گیا جسے ابتدائی طور پر دل کا دورہ پڑنا بتایا جا رہا ہے۔ صورتحال کی نزاکت کو دیکھتے ہوئے پائلٹ نے فوری طور پر شمس آباد ایئر ٹریفک کنٹرول سے رابطہ کیا اور ایمرجنسی لینڈنگ کی اجازت طلب کی۔
طیارے کے اترتے ہی ایئرپورٹ کی میڈیکل ٹیم نے طیارہ کے اندر ہی مریض کو ابتدائی طبی امداد دی لیکن حالت تشویشناک ہونے کی وجہ سے اسے گرین چینل کے ذریعہ فوری طور پر جوبلی ہلز کے اپولو اسپتال منتقل کر دیا گیا۔
سعودی ایئر لائنز کے نمائندوں کا کہنا ہے کہ طبی کارروائی مکمل ہونے کے بعد طیارہ واپس جدہ کے لیے روانہ ہوگا۔
