جالنہ میں دودھ نہ دینے پر گائے کو قتل کرنے کا الزام، مقدمہ درج

مہاراشٹر کے جالنہ ضلع میں ایک شخص پر الزام ہے کہ اس نے دودھ نہ دینے پر گائے کو بے رحمی سے قتل کر دیا۔ پولیس نے اس معاملے میں مقدمہ درج کر لیا ہے۔

تحصیل پولیس اسٹیشن کے ایک اہلکار کے مطابق، جمواڑی گاؤں کا رہنے والا ایک شخص منگل کے روز اپنی گائے کا دودھ نکالنے کی کوشش کر رہا تھا، لیکن گائے نے دودھ دینے سے انکار کر دیا اور گائے نے اسے زور سے لات مار دی ۔

اس پر وہ شخص مشتعل ہوگیا بعد ازاں، اس نے ایک کوڑا اٹھا کر گائے کے سر پر مارا، جس کے نتیجے میں گائے موقع پر ہی ہلاک ہو گئی۔

واقعے کی اطلاع ملتے ہی کچھ گاؤ رکھشک گروپوں اور بجرنگ دل کے کارکنوں نے جائے وقوعہ پر پہنچ کر احتجاج کیا۔

پولیس نے بجرنگ دل کے ایک کارکن کی شکایت پر ملزم کے خلاف بھارتیہ نیائے سنہتا کی دفعہ 325 کے تحت مقدمہ درج کر لیا ہے، جو کسی جانور کو جان بوجھ کر مارنے، زہر دینے، معذور کرنے یا بیکار بنانے جیسے جرائم سے متعلق ہے۔
پولیس کا کہنا ہے کہ معاملے کی مزید تفتیش جاری ہے۔