چندرابابو نائیڈو کی حلف برداری کی تاریخ تبدیل

وجئے واڑہ: تلگو دیشم پارٹی (ٹی ڈی پی) کے سربراہ این چندرابابو نائیڈو 12 جون کو آندھرا پردیش کے وزیر اعلی کے طور پر حلف لیں گے۔

ٹی ڈی پی پولیٹ بیورو کے رکن اور ایم ایل اے گورنتلا بوچیا چودھری نے جمعرات کے روز یہاں میڈیا کو یہ اطلاع دی۔

چودھری نے کہا کہ 11 جون کو قانون ساز پارٹی کے لیڈر کے انتخاب کے لیے قانون ساز پارٹی کی میٹنگ ہوگی۔

انہوں نے بتایا کہ حلف برداری کی تقریب میں وزیر اعظم نریندر مودی کو مدعو کیا جائے گا۔ انہوں نے کہا کہ نائیڈو 8 جون کو دہلی میں وزیر اعظم کی حلف برداری کی تقریب میں بھی شرکت کریں گے۔

انہوں نے کہا کہ حلف برداری کی تقریب راجدھانی امراوتی میں منعقد کی جائے گی لیکن ابھی جگہ کا فیصلہ نہیں کیا گیا ہے۔