وزیر اعلی نائیڈو نے وشاکھاپٹنم میں دھماکہ کے مہلوکین کے اہل خانہ کے لیے 10 لاکھ روپے کی امداد کا اعلان کیا

وجے واڑہ: آندھرا پردیش کے وزیر اعلیٰ این چندرا بابو نائیڈو نے کل وشاکھاپٹنم میں ویلڈنگ کی دکان میں ہونے والے دھماکے میں مرنے والے تینوں افراد کے اہل خانہ کو 10 لاکھ روپے کی امداد دینے کا اعلان کیا ہے۔

وزیر اعلی نے آج 10 لاکھ روپے کی مالی امداد کا اعلان کیا اور عہدیداروں کو ہدایت دی کہ وہ تینوں مہلوکین کے لواحقین کو امدادی رقم مہیا کرائیں۔ مسٹر نائیڈو نے متعلقہ حکام کو زخمیوں کو بہترین طبی علاج فراہم کرنے کی بھی ہدایت دی۔

واضح رہے کہ یہ تینوں افراد ماہی گیری کی بندرگاہ کے قریب ویلڈنگ کی دکان میں ہونے والے زوردار دھماکہ کی زد میں آگئے تھے۔ دھماکہ گیس سلنڈر پھٹنے سے ہوا تھاجس میں گنیش (45) ، متیالو (27) اور سرینو (32) کی موت ہوگئی تھی۔ تین دیگر زخمیوں کی حالت بھی تشویشناک بتائی جاتی ہے۔