اے پی کے الوری سیتاراما راجو ضلع میں سردی کی شدت میں روز بروز اضافہ

حیدرآباد: اے پی کے الوری سیتاراما راجو ضلع کے پاڈیرو ایجنسی کے بیشتر علاقوں میں سردی کی شدت میں روز بروز اضافہ ہو رہا ہے۔ ضلع کے کئی منڈلوں میں درجہ حرارت واحد عدد تک گر گیا ہے۔

جی۔ مڈوگول میں 4.5 ڈگری سیلسیس،منی مولورو میں 5.5 ڈگری سیلسیس،پاڈیرومیں 7 ڈگری سیلسیس،اراکو ویلی، چنتاپلی اور ہکم پیٹ میں 4 سے 7 ڈگری سیلسیس کے درمیان درجہ حرارت ریکارڈ کیاگیا۔

شمالی ہند سے آرہی ہواؤں اور گھنی کہر کی وجہ سے صبح کے وقت گاڑی چلانے والوں کو شدید مشکلات کا سامنا کرنا پڑ رہا ہے۔ حکام نے قبائلی علاقوں کے ضعیف افراد اور بچوں کو خصوصی احتیاط کا مشورہ دیا ہے۔

دوسری جانب، یہ شدید سردی سیاحوں کے لئے کشش کا باعث بنی ہوئی ہے۔ اراکو اور لمباسیگی جیسے مقامات پر سیاحوں کی تعداد میں مسلسل اضافہ ہو رہا ہے۔ محکمہ موسمیات کے مطابق سردی کی یہ لہر دسمبر کے آخر تک جاری رہنے کا امکان ہے۔