انتخابی وعدوں کو پوراکرنے میں ناکام کانگریس حکومت کسانوں کے اعتماد کودھوکہ دے رہی ہے:کے لکشمن

حیدرآباد: راجیہ سبھا کے رکن اور بی جے پی او بی سی مورچہ کے قومی صدر ڈاکٹر کے لکشمن نے تلنگانہ میں کانگریس حکومت پر شدید تنقید کرتے ہوئے الزام لگایا ہے کہ وہ انتخابی مہم کے دوران کئے گئے وعدوں کو پورا کرنے میں ناکام ہوکر کسانوں کے اعتماد کو دھوکہ دے رہی ہے۔اتوار کو یہاں ایک پریس ریلیز میں، ڈاکٹر لکشمن نے الزام لگایا کہ وزیراعلی اے ریونت ریڈی کی قیادت والی کانگریس حکومت نے کسانوں کے لیے اہم اسکیموں میں کمی کرتے ہوئے ”کٹوتی کا اصول” نافذ کیا ہے۔

انہوں نے کہا، کہ کسان ادھورے وعدوں کے بوجھ تلے دب رہے ہیں، قرض کی معافی، رعیتوبندھو یا رعیتوبھروسہ، اور بونس کی ادائیگی کے مسئلہ پر کسانوں کو مشکل صورتحال کا سامنا ہے۔ڈاکٹر لکشمن نے حکومت کی اسکیموں میں تضادات کی نشاندہی کرتے ہوئے کہا کہ رعیتوبھروسہ کے تحت 15,000 روپے سالانہ امداد کا وعدہ بے زمین کسانوں کے لیے 12,000 روپے کر دیا گیا ہے۔

اسی طرح 7,500 روپے فی ایکڑ کی امداد کو 6,000 روپے کر دیا گیا ہے۔ انہوں نے کسانوں کے لیے انشورنس اور فصل اگانے کے لیے سرمایہ کاری میں مدد فراہم کرنے میں حکومت کی تاخیر پر تنقید کی۔ انہوں نے کہاکہ مانسون ختم ہو چکا ہے، اور فصل کی کٹائی کا موسم ختم ہو رہا ہے، پھر بھی کسان انشورنس اور سرمایہ کاری کی امداد کے منتظر ہیں۔

بی جے پی لیڈر نے کانگریس حکومت کی طرف سے 2 لاکھ روپے کے قرض کی معافی کے وعدے سے نمٹنے کو بھی نشانہ بنایا، اس بات کی نشاندہی کرتے ہوئے کہ صرف جزوی ریلیف فراہم کی گئی ہے، انہوں نے کہاکہ اہل 42 لاکھ کسانوں میں سے، اب تک صرف 25.35 لاکھ نے فائدہ اٹھایا ہے۔ بقیہ 16.65 لاکھ کسان ابھی تک انتظار کر رہے ہیں۔

 پچھلی حکومت کے ایک لاکھ روپے کی معافی کے مقابلے، 2 لاکھ روپے کی معافی کے لیے فائدہ اٹھانے والوں کی تعداد میں کمی آئی ہے۔ ڈاکٹر لکشمن نے دھان، کپاس، مکئی اور ہلدی سمیت مختلف فصلوں کے لیے اضافی 500 روپے بونس فراہم کرنے کے اپنے وعدے کو پورا کرنے میں کانگریس کی ناکامی کو اجاگر کیا۔

انہوں نے زور دے کر کہا، ”یہاں تک کہ دھان کے لیے وعدہ کردہ بونس کو بھی کم معیار کے اناج تک کم کر دیا گیا ہے۔ تلنگانہ کے کسانوں کے ساتھ دھوکہ دہی کو معاف نہیں کیا جائے گا”۔