رود موسیٰ کے متاثرین کے ساتھ انصاف ہوگا، وزیر پونم پربھاکر کی یقین دہانی

حیدرآباد: حیدرآباد کے انچارج ووزیر ٹرانسپورٹ اور بی سی بہبود پونم پربھاکر نے واضح کیا کہ کانگریس حکومت حیدرآباد کی کھوئی ہوئی عظمت کو یقینی طور پر واپس لائے گی۔

انہوں نے کہا کانگریس حکومت موسیٰ ریور فرنٹ متاثرین کے مسائل کو حل کرنے کے لیے تیار ہے۔ پونم پربھاکر نے کہا کہ حکومت بے گھر افراد کی مدد کے بعد ہی موسیٰ ندی کی خوبصورتی کے کام شروع کرے گی۔

سکریٹریٹ میڈیا سنٹر میں میڈیا سے بات کرتے ہوئے انہوں نے کہا کہ ریاستی حکومت نے موسی ندی کو صاف کرنے کے لیے 5,500 کروڑ روپے کا منصوبہ تیار کیا ہے۔

انہوں نے کہا کہ حیدرآباد کے عوام اپوزیشن جماعتوں کی سازشوں کو دیکھ رہے ہیں۔ انہوں نے کہا کہ موسی ریور بیڈ میں واقع مکانات کا سروے جاری ہے اور حکومت ان متاثرین کی بازآبادکاری کرے گی۔

اپوزیشن پارٹیوں کے ان الزامات کی مذمت کرتے ہوئے کہ کانگریس حکومت موسیٰ ندی کے متاثرین کے ساتھ ناانصافی کر رہی ہے، پربھاکر نے بی آر ایس کے کارگزار صدر کے ٹی راما راؤ کو پیشکش کی، جو حائیڈرا کے سلسلہ میں کانگریس حکومت پر کڑی تنقید کر رہے ہیں، ان کے ساتھ اپنے خیالات کا اظہار کریں، اگر کے ٹی راما راؤ واقعی لوگوں سے محبت ہے۔

انہوں نے الزام لگایا کہ بی آر ایس قائدین نے 10 سال تک جب بی آر ایس اقتدار میں تھی بڑے بڑے الفاظ کہنے کے علاوہ کچھ نہیں کیا۔ تاہم اب وہی بی آر ایس لیڈر کانگریس حکومت کے خلاف نفرت کو ہوا دے رہے ہیں۔