کالیشورم پراجکٹ کے نام پر بدعنوانی، کے سی آر کا جیل جانا یقینی: جیون ریڈی

حیدرآباد: تلنگانہ کانگریس کے سینئر لیڈر و رکن قانون ساز کونسل جیون ریڈی نے کہا کہ وزیراعلی کے چندر شیکھر راؤ نے کالیشورم پراجکٹ کے نام پر بدعنوانی کی ہے اور ان کا جیل جانا یقینی ہے۔

انہوں نے کہا کہ ریاست میں کانگریس حکومت کے برسراقتدار آنے کے بعد وہ کالیشورم پروجیکٹ کی بدعنوانی کی جانچ برسرخدمت جج سے کروائیں گے۔

جیون ریڈی نے جگتیال کے اندرا بھون میں میڈیا سے بات کرتے ہوئے کہا کہ کانگریس کے دور حکومت میں 38 ہزار کروڑ سے دریائے گوداوری سے پانی کولفٹ کروانے کیلئے پرانہیتا۔

چیوڑلہ پراجکٹ شروع کیاگیا تھا تاہم بی آرایس حکومت نے اس کا نام تبدیل کرتے ہوئے کالیشورم پراجکٹ رکھ دیا۔ ساتھ ہی اس کے ڈیزائن میں دوبارہ تبدیلی کی گئی اور اس کی لاگت میں اضافہ کرتے ہوئے 120کروڑکردیاگیا۔

انہوں نے کہا کہ کالیشورم پراجیکٹ کے میڈی گڈا بیریج کے پُل کو نقصان پہنچا۔اس کی صورتحال سمجھ میں نہیں آرہی ہے۔انہوں نے برہمی کااظہار کرتے ہوئے کہا کہ میڈیا کو پمپ کو دیکھنے کی اجازت نہیں دی جارہی ہے جو پانی میں ڈوبے ہوئے ہیں۔

انہوں نے سوال کیا کہ مرکزی حکومت کالیشورم پروجیکٹ کی بدعنوانی کی تحقیقات کیوں نہیں کر رہی ہے؟ انہوں نے کہا کہ کالیشورم پروجیکٹ کے سلسلہ میں وزیراعلی کے چندرشیکھرراو اور بی جے پی میں ساز باز ہوئی ہے۔