دہلی میں گھنا کہرا، انڈیگو اور ایئر انڈیا نے پروازوں میں تاخیر کی وارننگ جاری کی

نئی دہلی: دہلی-قومی راجدھانی خطہ (این سی آر) میں پیر کی صبح گھنا کہرا چھایا رہا، جس کے باعث اندرا گاندھی بین الاقوامی ہوائی اڈے پر حدِ بصارت کم ہو گئی۔ اس صورتحال کے پیش نظر انڈیگو اور ایئر انڈیا سمیت مختلف فضائی کمپنیوں نے پروازوں میں ممکنہ تاخیر کے حوالے سے وارننگ جاری کی ہے۔

محکمۂ موسمیات کے مطابق پالم میں صبح تقریباً 4:30 بجے حدِ نگاہ 100 میٹر تک رہ گئی، جبکہ 5 سے 7 کلومیٹر فی گھنٹہ کی ہلکی مغربی ہواؤں کے ساتھ اس کے مزید کم ہو کر 50 میٹر تک پہنچنے کا امکان ہے۔ کم حدِ نگاہ کے باعث پروازوں کے آپریشن پر اثر پڑنے کا خدشہ ہے، خاص طور پر صبح کے ابتدائی اوقات میں۔

انڈیگو اور ایئر انڈیا نے سوشل میڈیا پلیٹ فارم ایکس پر بیانات جاری کرتے ہوئے کہا ہے کہ وہ صورتحال پر گہری نظر رکھے ہوئے ہیں اور مسافروں کو مشورہ دیا ہے کہ وہ اپنی پرواز کی صورت حال سے متعلق تازہ معلومات کے لیے سرکاری ویب سائٹس اور موبائل ایپلیکیشنز سے معلومات حاصل کرتے رہیں۔

ایئرلائنز نے مسافروں کو یقین دہانی کرائی ہے کہ سلامتی ان کی اولین ترجیح ہے اور ممکنہ رکاوٹوں کے دوران مسافروں کی مدد کے لیے گراؤنڈ ٹیمیں اسٹینڈ بائی پر ہیں۔ مسافروں سے اپیل کی گئی ہے کہ موسم کی چیلنجنگ صورت حال کو مدنظر رکھتے ہوئے اپنے سفر کی منصوبہ بندی اسی کے مطابق کریں۔